Դավութօղլուն ձմռանը Թուրքիայում քաղաքացիական հուզումներ է կանխատեսում

Թուրքիայի նախկին վարչապետ և ընդդիմադիր «Ապագա» կուսակցության առաջնորդ Ահմեդ Դավութօղլուն հայտարարել է, թե մտահոգված է, որ ձմռան ամիսներին Թուրքիայում կարող են տեղի ունենալ «որոշ միջադեպեր» քաղաքացիական խոշոր անկարգությունների տեսքով, գրում են թուրքական լրատվամիջոցները։ Դավութօղլուի մեկնաբանությունները հնչում են  վատթարացող տնտեսական ճգնաժամի ֆոնին։

Հուլիսի սկզբին էլ Թուրքիայի «Հաղթանակ» կուսակցության ղեկավար Ումիթ Օզդաղն էր հայտարարել, թե երկրում քաղաքացիական պատերազմ է սպասվում, ինչի առիթով ՆԳՆ-ն հետաքննություն էր սկսել նրա դեմ։ Ներքին գործերի նախարարությունը Օզդաղին մեղադրել էր «կեղծ պնդումներ անելու մեջ»։

«Թույլ տվեք ասել, որ յուրաքանչյուր գիտակից և պատասխանատու քաղաքական գործիչ պետք է պատրաստ լինի ամեն սցենարի։ Ցավոք սրտի, բևեռացման միջավայրը, որում գտնվում է Թուրքիան, ունի բազմաթիվ բացասական սցենարներ առաջացնելու հատկություն»,-ասել է Դավութօղլուն T24-ի հետ հարցազրույցում՝ հավելելով․ «Ես իսկապես շատ մտահոգված եմ այս ձմեռով: Ես մտավախություն ունեմ, որ այս ձմռանը կարող են որոշ միջադեպեր տեղի ունենալ հատկապես տնտեսական ճգնաժամի պայմաններում։ Բոլոր  պետական գործիչներն ու քաղաքական գործիչները պետք միավորվեն ողջամիտ կետում»։ Նա նշել է, որ Թուրքիայում  նկատում է սոցիալական լարվածության աճ։

Հավելենք, որ Թուրքիան բախվում է վերջին տասնամյակների ամենավատ տնտեսական ճգնաժամին,  տարեկան գնաճը  հասել է 78,62 տոկոսի, ինչը վերջին 20 տարում ամենաբարձր ցուցանիշն է։

Էմմա Չոբանյան