Օմիկրոն շտամի ևս մեկ տարատեսակ․ ինչքանո՞վ է այն վտանգավոր

Կորոնավիրուսի նոր մուտացիան, որը կոչվում է BA.2.75, առաջին անգամ հայտնաբերվել է Հնդկաստանում հունիսի սկզբին:  SARS-CoV-2-ի այս տարբերակով վարակման դեպքեր արդեն գրանցվել են Ճապոնիայում, Գերմանիայում, Մեծ Բրիտանիայում, Կանադայում, ԱՄՆ-ում, Ավստրալիայում և Նոր Զելանդիայում։  Վարակի այս շտամն առաջացել է BA.2 օմիկրոն տարբերակից, գրում է DW-ի ռուսական ծառայությունը:

«Այս տարբերակի վերաբերյալ տվյալների քանակն առայժմ խիստ սահմանափակ է», – DW-ին բացատրել է Ավստրիայի գիտությունների ակադեմիայի գենետիկ և մոլեկուլային կենսաբան Ուլրիխ Էլինգը: «Բայց այն ունի մի քանի առանձնահատկություններ, որոնք մեզ ստիպում են ուշադրություն դարձնել վիրուսի այս տեսակին»:

Իր սկզբնական տարբերակի՝ BA.2-ի համեմատ՝ նոր կորոնավիրուսային տարբերակն ունի ութ լրացուցիչ սպիտակուցի մուտացիա: Այս մուտացիաների հատուկ տեղակայման պատճառով գիտնականները մտավախություն ունեն, որ BA.2-ի դեմ ձևավորված իմունիտետը կարող է արդյունավետ չլինել BA.2.75-ի դեմ:

Այլ կերպ ասած, BA.2 օմիկրոնի տարբերակից ապաքինված անձը կարող է կրկին վարակվել կորոնավիրուսով, եթե շփվի BA.2.75 տարբերակի կրիչի հետ:

Էլինգն ընդգծում է, որ մասնագետները դեռևս հաստատ ոչինչ չգիտեն նոր տարբերակի մասին, բայց այն փաստը, որ BA.2.75-ը տարածվել է Հնդկաստանի առնվազն երեք տարբեր շրջաններում, հուշում է, որ BA.2.75-ը կարող է խուսափել օրգանիզմի իմունային պատասխանից:

Լոնդոնի Կայսերական քոլեջի ինֆեկցիոն հիվանդությունների բաժանմունքի վիրուսաբան Թոմ Փիքոքը թվիթերում գրել է, որ իր կարծիքով BA.2.75-ի բազմաթիվ մուտացիաները և աշխարհագրական լայն տարածումը այն դարձնում են «համակ ուշադրության արժանի»:

Տաթև Ֆռանգյան