17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
Էրդողանը՝ Թուրքիայի օդային տարածքով Իսրայելի նախագահի օդանավի թռիչքն արգելափակելու մասին
Քաղաքականություն
20.11.2024 | 14:24
Թուրքիայի նախագահ Ռեջեփ Թայիփ Էրդողանը Բրազիլիայում G20-ի առաջնորդների գագաթնաժողովի շրջանակում հրավիրված ասուլիսում անդրադարձել է նաև Իսրայելի հետ հարաբերություններին։ Անադոլու գործակալության փոխանցմամբ՝ նա նշել է, որ Թուրքիան խզել է առևտրային հարաբերություններն Իսրայելի հետ, նաև հաստատել՝ Անկարան է արգելափակել COP29-ին մասնակցելու համար Բաքու մեկնող Իսրայելի նախագահի թռիչքը։
«Նախ՝ մենք խզել ենք առևտրային հարաբերություններն Իսրայելի հետ։ Ինչ վերաբերում է Իսրայելի նախագահի՝ COP29 գագաթնաժողովին Ադրբեջան մեկնելու հարցին, մենք նրան թույլ չենք տվել օգտագործել մեր երկրի օդային տարածքը։ Կան շատ տարբեր երթուղիներ, տարբեր հնարավորություններ, մենք ասել ենք՝ օգտվեք այդ հնարավորություններից»,- հայտարարել է Էրդողանը։
Նշենք, որ Իսրայելի նախագահ Իցհակ Հերցոգի այցը Բաքու նախատեսված էր նոյեմբերի 19-ին։ Սակայն նոյեմբերի 16-ին Իսրայելի նախագահի գրասենյակը հայտնել էր, որ «իրավիճակը գնահատելուց հետո և անվտանգության նկատառումներից ելնելով՝ նախագահը որոշել է չեղարկել մասնակցությունը Ադրբեջանում կայանալիք կլիմայական համաժողովին»:
Ավելի ուշ ադրբեջանական, այնուհետև իսրայելական աղբյուրները սկսեցին տեղեկություններ տարածել, որ պատճառը Թուրքիայի կողմից իր օդային տարածքով թռիչքի արգելափակումն է։ Դրանից հետո այս տեղեկությունը հաստատեցին նաև թուրքական աղբյուրները։
Թարգմանությունը՝ Էմմա Չոբանյանի
