14.10.2026 | 17:20
OpenAI-ի գրասենյակում գաղտնալսող սարք է հայտնաբերվել․ ՀԴԲ-ն հետաքննություն է իրականացնում
ՄԻՊ Արման Թաթոյանն այցելել է Արարատի մարզի համայնքներ
Հասարակություն
11.05.2018 | 12:29
Մարդու իրավունքների պաշտպան Արման Թաթոյանը երեկ այցելել է Արարատի մարզի համայնքներ: Ապրիլին հավաքների մասնակիցների իրավունքների պաշտպանության նպատակով Ոստիկանության Ձերբակալվածների պահման վայրեր այցերից մեկի ժամանակ Պաշտպանն առանձնազրույց է ունեցել նաև այնտեղ գտնվող Այգեպատ գյուղի բնակչի հետ, ով բարձրացրել է նաև համայնքի ոռոգման ջրի խնդիրը և խնդրել Պաշտպանի աջակցությունը լուծման հարցում:
Համայնքի բնակիչները Պաշտպանի հետ հանդիպման ժամանակ բարձրացրել են նաև մանկապարտեզի բացակայության, համայնքների խոշորացման հետ կապված խնդիրներ: Արման Թաթոյանը նշել է՝ իր իրավասության շրջանակում հետևողական է լինելու դրանց լուծման ուղղությամբ:
Արարատի մարզի մյուս՝ Բերքանուշ գյուղում, բնակիչները Պաշտպանի հետ քննարկել են ավելի վաղ աշխատակազմ ուղարկված բողոքի ընթացքը: Խնդիրն այն է, որ Հյուսիս-հարավ ավտոմայրուղու կառուցման պատճառով քանդվել է համայնքից դեպի արոտավայրեր և մշակվող հողատարածքներ տանող անցուղին, և բնակիչները ստիպված են լինում մի քանի գյուղերի ճանապարհ կտրել իրենց պատկանող տարածքներ հասնելու համար:
Պաշտպանը խոստացել է շահագրգիռ կողմերի հետ քննարկում կազմակերպել ժամանակավոր և վերջնական լուծումներ գտնելու համար:
Հիշեցնենք, որ ավելի վաղ սահմանամերձ Տավուշի մարզի համայնքներ Պաշտպանի այցից հետո վերջինիս աջակցությամբ լուծվել են բնակիչների բարձրացրած մի շարք խնդիրներ. աչքի վիրահատության, ուսման վարձի զեղչի, զինծառայողի քթի վիրահատության և այլ հարցեր:
