15.11.2024 | 23:30
Թուրքիայի նախագահականը հերքում է Էրդողանի և նրա դաշնակից Բահչելիի միջև տարաձայնությունները քրդական հարցի շուրջ
Փաշինյանին ավելի հեշտ կհաջողվի ԸՕ-ն փոխել Սահմանադրական հանրաքվեի միջոցով, քան ԱԺ-ում, քանի որ ՀՀԿ-ն կարող է խոչընդոտել․ Վարդան Այվազյան. ՏԵՍԱՆՅՈՒԹ
Քաղաքականություն
03.05.2018 | 19:06
ԵՊՀ սահմանադրական իրավունքի ամբիոնի վարիչ Վարդան Այվազյանը Factor.am-ի հետ զրույցում ասում է, որ եթե մայիսի 8-ին Նիկոլ Փաշինյանը կարողանա ընտրվել վարչապետ, նրա համար ավելի հեշտ կլինի սահմանադրական հանրաքվեի միջոցով Ընտրական օրենսգրքի փոփոխություններ անել։
«Քանզի ԱԺ մեծամասնությունում են ՀՀԿ-ականները, որոնք կարող են խոչընդոտել, իսկ սահմանադրական փոփոխությունները հանրաքվեի միջոցով են լինելու։ Եվ նա, ունենալով մեր հանրության այս մեծ աջակցությունը, կարող է կազմակերպել սահմանադրական փոփոխությունները և դրա հիման վրա օբյեկտիվորեն սահմանադրական պահանջ կլինի, որ ընթացիկ օրենքները նույնպես շատ օպերատիվ կերպով հարմարեցվեն փոփոխված Սահմանադրությանը»,- նշեց Այվազյանը։
Ըստ նրա՝ խորհրդարանական ընտրությունները այլընտրանք չունեն, սակայն դրա համար պետք է խորհրդարանի ուժերի կոնսոլիդացիա։ «Ընտրական օրենսգիրքը համարվում է սահմանադրական օրենք, որի փոփոխության համար անհրաժեշտ է ԱԺ պատգամավորների առնվազն 3/5-ի քվեն։ Այս առումով նա պետք է կարողանա կոնսոլիդացնել ԱԺ բոլոր ուժերին, որպեսզի այդ 3/5-ի քվեներով ԸՕ նախագիծն ընդունեն։ Հակառակ պարագայում, եթե դա չստացվեց, արտահերթ ընտրությունները շատ դժվար կլինի անցկացնել»,- ասաց սահմանադրագետը։
Նրա խոսքով՝ տեսականորեն ՀՀԿ-ն կարող է խոչընդոտել դրան, և ցանկացած օրինագծի, քանզի ունի 58 պատգամավոր՝ մեծամասնություն, դրա համար անհրաժեշտ է, որ լայն կոնսոլիդացիա լինի քաղաքական բոլոր ուժերի միջև։
«Առանց ՀՀԿ-ի աջակցության Ընտրական օրենսգրքում որևէ փոփոխություն հնարավոր չէ։ Բացի ԸՕ-ից, հիմնովին վերափոխման կարիք ունի նաև «Ազատ հավաքների անցկացման մասին» օրենքը»,- ասաց նա։
Ո՞րն է «թավշյա հեղափոխության» սահմանադրական ուղին՝ հարցին ի պատասխան սահմանադրագետն ասաց, որ մեր Սահմանադրությունը դա չի կարգավորում։ «Միայն նշված է, որ իշխանությունը պատկանում է ժողովրդին և ժողովուրդն իր իշխանությունն իրականացնում է պետական և տեղական ինքնակառավարման մարմինների և դրանց պաշտոնատար անձանց միջոցով։ Ընդամենը այս 2 դրույթը, որոնք, ըստ էության, ունեն դեկլարատիվ բնույթ»։
Մանրամասները դիտեք Վարդան Այվազյանի հետ Factor.am-ի հարցազրույցում։
Մարինե Խառատյան
