05.11.2026 | 12:39
ԵՄ ընդլայնումը հրատապ է․ չենք կարող երկար սպասեցնել թեկնածու երկրներին․ Կալաս
Սաուդյան Արաբիան հայտնել է նավթային հսկա Aramco-ի շենքին հութիների հրթիռային հարվածների մասին․ չորս մարդ է վիրավորվել
Քաղաքականություն
14.10.2026 | 13:14
Սաուդյան Արաբիան հայտնել է, որ երկրի արևելքում գտնվող պետական նավթային Aramco ընկերության գլխամասի շենքի վրա հարձակման հետևանքով «սահմանափակ մակերեսով հրդեհ» է բռնկվել, իսկ Եմենի հութիների արձակած և որսված հրթիռների բեկորներից մայրաքաղաք Էր Ռիադում չորս մարդ է վիրավորվել, գրում է France 24-ը։
Դեպքը տեղի է ունեցել այն բանից մի քանի ժամ անց, երբ Եմենի հութիների դեմ պայքարող՝ Սաուդյան Արաբիայի գլխավորած կոալիցիան հայտնել էր, որ երեքշաբթի երեկոյան որսացել է մի քանի հրթիռ, այդ թվում՝ Էր Ռիադի երկնքում։
Նավթային հսկա Aramco-ի վարչական շենքը գտնվում է Դահրանում։ Հարվածի հետևանքով վիրավորվել է չորս մարդ՝ երկու կին, մեկ տղամարդ և մեկ երեխա, 15 տուն վնասվել է։
Արժույթի միջազգային հիմնադրամի ղեկավարը չորեքշաբթի հայտարարել է, որ Սաուդյան Արաբիայի դեմ վերջին հարձակումները կարող են ազդել «բոլորի վրա՝ ամենուր», քանի որ ամբողջ աշխարհում էներգակիրների գները բարձրանում են, իսկ նավթով հարուստ տարածաշրջանում միաժամանակ մի քանի հակամարտություն է ընթանում։
«Սաուդյան Արաբիայի տնտեսությունը կարևոր նշանակություն ունի տարածաշրջանի և ամբողջ աշխարհի համար։ Այդ առումով, այս զարգացումները կարող են բացասական հետևանքներ ունենալ բոլորի համար՝ աշխարհի ցանկացած վայրում»,- Բանգկոկում ԱՄՀ-ի և Համաշխարհային բանկի տարեկան հանդիպումների շրջանակում կայացած մամուլի ասուլիսում ասել է ԱՄՀ տնօրեն Քրիստալինա Գեորգիևան։
Եմենի հութիների դեմ պայքարող՝ Սաուդյան Արաբիայի գլխավորած կոալիցիան այսօր ավելի վաղ հայտնել է, որ որսացել է խմբավորման կողմից Էր Ռիադի ուղղությամբ արձակված հրթիռը։ Ավելի վաղ AFP-ի լրագրողները հաղորդել էին սաուդյան մայրաքաղաքում պայթյունների մասին։
«Էր Ռիադի ուղղությամբ ահաբեկչական հուսիթական զինված խմբավորման արձակած բալիստիկ հրթիռի որսում և ոչնչացում»,- X-ում գրել է կոալիցիայի խոսնակ Թուրք Ալ-Մալքին։
France 24-ը նշում է, որ վերջին մարտական գործողությունները տեղի են ունենում այն բանից մեկ օր անց, երբ Ռիադում Ֆրանսիայի դեսպանատունն իր քաղաքացիներին կոչ է արել խուսափել հութիների թիրախում հայտնված Սաուդյան Արաբիայի օդանավակայաններից։ Մի շարք օտարերկրյա ավիաընկերություններ ևս դադարեցրել են թռիչքները դեպի Ռիադի միջազգային օդանավակայան, որն ավելի վաղ ենթարկվել էր մահացու հրթիռային հարձակման։
Թարգմանությունը՝ Էմմա Չոբանյանի
