Շիրակի մարզում նոր անտառ է հիմնվում

Շիրակի մարզի Մեծ Սարիար գյուղում «ԵՄ-ն շրջակա միջավայրի համար. կանաչ համայնք՝ դիմակայուն ապագա» ծրագրի շրջանակում նոր անտառ են հիմնում։

Գաղափարը Ախուրյան խոշորացված համայնքի ղեկավարի տեղակալ Կարեն Արշակյանին է, որը Factor.am-ի հետ զրույցում հայտնեց, որ ծրագիրը 1,5 տարի առաջ են սկսել։

«Անտառը հիմնում ենք Մեծ Սարիարի հյուսիսային հատվածում, գիտեք, որ Սարիարի երկու կողմերում կան անտառներ։ Եկան ուսումնասիրություններ կատարեցին, տարբեր եղանակներին հողի շերտի խոնավությունը պարզեցին։ Սկզբում որոշել էինք 52 հեկտար տարածություն դարձնել անտառ, հետո՝ 60 հեկտար։ 60 հեկտարի կեսն արդեն տնկված է, մոտ 70 հազար ծառ է տնկված, եվս 100-110 հազար տնկանյութ էլ դեռ ունենք աճեցնելու։ Այս պահին ցանկապատման աշխատանքներ ենք կատարում, որպեսզի անասունները չմտնեն ներս։ Աշնանը կվերսկսենք ծառատունկը», -ասաց Կարեն Արշակյանը։

Նա տեղեկացրեց, որ աշխատանքները կատարվում են վճարովի հիմունքներով, տնկիները տրամադրում են, մարդիկ աշխատավարձով աշխատում են։ Անտառի հիմնումից հետո էլ մշտական հաստիքով անտառապահներ կլինեն։

Կհիմնվի նաև արտադրամաս, որտեղ կոնի մուրաբաներ կարտադրեն ու այսպիսով կլուծեն տեղի բնակիչների զբաղվածության խնդիրը։ Այս նպատակի համար ևս 60 հեկտար հողամաս կտրամադրեն։

Անտառում կտնկեն եղևնի, բոխի, կեչի, թխկի, սոճի, վայրի խնձորենի, տանձենի։

Ծառատեսակներն ընտրվել են լանդշաֆտային գոտու առանձնահատկությունները հաշվի առնելով։

«Շատ սիրուն վայր է, Սարիարի վերին հատվածից որ նայում ես, Շիրակի դաշտավայրն ամբողջությամբ երևում է, սա զբոսաշրջային եզակի վայր կդառնա։ Այդ տարածքում նաև կենդանիների բազմացում կլինի, եղնիկներն էլ կունենաք, վայրի խոզեր էլ»,-ասաց Կարեն Արշակյանը։

Արմիկ Մովսիսյան