Քաղաքականություն
04.05.2022 | 14:38Ընդդիմությունը կեղծ թեզ է առաջ քաշում, թե 2021թ․-ին իշխանությանն ընտրած 600 հազարից ավելի քաղաքացիները սխալվել են։ Այս մասին այսօր ԱԺ լիագումար նիստում անդրադառնալով դիմադրության շարժման բողոքի գործողություններին՝ ասաց ՔՊ խմբակցության պատգամավոր Գուրգեն Արսենյանը։
«Ընկերներիցս մեկը զանգեց, ասաց՝ հղում եմ ուղարկել, նայի այդ հաղորդումը։ Նայեցի։ Մեկը մեր լրագրության դաշտում որպես զազրախոսության մոհիկան հայտնի լրագրուհի է, զրուցակիցը՝ ալամ աշխարհի մեգաէկոնոմիկայի մասնագետ մի նախկին վարչապետ՝ ՀՀ արդյունաբերության գերեզմանափորը։ Լրագրողը հարց է տալիս ու ասում՝ Արսենյանը, Սուքիասյանը, Վիգեն Խաչատրյանը կոչեր են անում խաղաղության, դուք ի՞նչ կասեք։ Այդ մեր հայրենակիցն էլ պատասխանում է, որ մեզ պետք է զրկել ՀՀ քաղաքացիությունից, բռնագրավել ունեցվածքը և փոխանցել Արցախի բանակին»,- նշեց Գուրգեն Արսենյանը։
Նրա խոսքով՝ ասվածում նորություն չկա, որովհետև այդպես ասողներն են իրականում կողոպտել ՀՀ քաղաքացիներին և ավարը տարել Արցախ՝ կիսելու․ «Սա է իրենց պատկերացումը, սրա համար են իրենք պայքարում… Այսինքն, հերթական կենաց խմողներից է»։
Գուրգեն Արսենյանի բնորոշմամբ՝ այսպես անողնԱերը հիշեցնում են Քիփլինգի խոսքը, որ փղերը մեռնելուց բոլորով մի տեղում են մեռնում՝ փղերի գերեզմանոցում․
«Հիմա ուզում են քաղաքական վախճան ունենալ, գնացեք վախճանվեք։ Ես ձեր համար կցավամ, բայց չեմ գա ձեր ձեռքը բռնելու ու ասելու, որ մի վախճանվեք։ Քաղաքական գործունեության հայտ եք ներկայացրել, բայց չունեք բովանդակություն։ Իմ գործընկեր Քրիստինե Գրիգորյանը երեկ դա շատ դիպուկ նկարագրեց։ Փաշինյանի հրաժարականն եք ուզո՞ւմ։ Նրան 2018թ․-ին դուք եք այստեղ վարչապետ ընտրել, դուք եք նրա կառավարության գործունեության ծրագիրը հաստատել։ Պատկերացում չունեք, որ հարյուր հազարավոր քաղաքացիների շունչը ձեզ ստիպեց դա անել»,- նշեց իշխանական պատգամավորը:
Մանրամասները՝ տեսանյութում:
