«Մենք պայքարում ենք այնպիսի արատավոր երևույթների դեմ, ինչպիսին են ցինիզմը, մեծամտությունը»․«Երկիր Ծիրանիի» 2 անդամները դուրս եկան խմբակցությունից

Երևանի ավագանու «Երկիր Ծիրանի» խմբակցության անդամներ Հայկ Պետրոսյանը և Մնացական Պարակշիևը իրենց գործունեությունը ավագանիում կշարունակեն որպես անկախ անդամներ՝ դուրս գալով «Երկիր Ծիրանի» խմբակցության:

Այս մասին հայտարարեցին Հայկ Պետրոսյանն ու Մնացական Պարակշիևը։

Հիշեցնենք, որ «Երկիր Ծիրանի» կուսակցության առաջնորդ Զարուհի Փոստանյանն անվտահություն էր հայտնել Հայկ Պետրոսյանին ու Մնացական Պարակշիևին՝ վերջիններիս մեղադրելով «դավաճանության մեջ»։

Զարուհի Փոստանջյանի՝ այլևս նախկին կուսակցական գործընկերները հայտարարություն են տարածել՝ անդրադառնալով «Երկիր Ծիրանի» կուսակցության հայտարարությանը։

«Երբ մենք պայքարում ենք այնպիսի արատավոր երևույթների դեմ, ինչպիսին են ցինիզմը, մեծամտությունը, անհանդուրժողականությունը, իրականության զգացողության իսպառ բացակայությունը, շատ կարևոր է, որպեսզի մենք ինքներս չդառնանք այդպիսին և լինենք բաց բազմակարծությանը և առողջ քննադատությանը։

Պետք է նշել, որ «Երկիր Ծիրանի» կուսակցության հայտարարությունից և անհիմն մեղադրանքներից հետո մենք բաց ենք եղել հետագա երկխոսության և խնդիրների հարթման համար, ինչի մասին խոսել ենք հարցազրույցների ժամանակ, սակայն մինչ այժմ ոչ մի արձագանք չենք ստացել։ Ուստի, որոշել ենք դուրս գալ խմբակցությունից, իսկ Մնացական Պարակշիևը նաև կուսակցության խորհրդից, կուսակցությունից և կուսակցության հիմնադիրների ցանկից։ Մենք շարունակելու ենք պաշտպանել երևանցու շահերը և իրականացնել Երևանի ծրագիրը, որպես անկախ ավագանու անդամներ։

Հարկ ենք համարում նշել, որ մոտ ժամանակներս մենք չենք պատրաստվում ստեղծել կուսակցություն, կամ միանալ որևէ կուսակցության։ Մենք դրսևորելու ենք ակտիվ քաղաքական կեցվածք։ Բաց ենք լինելու համագործակցության համար քաղաքական անձանց և ուժերի հետ, որոնք կիսում են մեր մոտեցումները։ Ստանալով քվե մեր քաղաքացիներից, մենք պարտավորված ենք զգում նրանց առջև և չենք կարող դավաճանել նրանց վստահությունը։ Մենք պարբերաբար հանդես կգանք մամուլում, կլինենք հաշվետու կատարած աշխատանքների համար»,-ասված է հայտարարության տեքստում։