Քաղաքականություն
15.10.2026 | 13:54Ճեպազրույցի ընթացքում վարչապետ Նիկոլ Փաշինյանն անդրադարձավ երկաթուղու վերազինման, ռուսական կոնցեսիոն կառավարման, ատոմակայանի կառուցման և 2031 թվականի ժամկետի վերաբերյալ լրագրողների հարցերին։
Վարչապետը հերքեց լրագրողի դիտարկումը, թե Հայաստանի իշխանությունները նահանջել են կամ մեղմացրել իրենց դիրքորոշումը Ռուսաստանի հետ հարաբերություններում։ Նա ընդգծեց, որ Ռուսաստանի ղեկավարության, մասնավորապես Վլադիմիր Պուտինի հետ շփումները միշտ էլ եղել են աշխատանքային և լավ։
Անդրադառնալով նոր ատոմակայանի կառուցմանը՝ Նիկոլ Փաշինյանը նշել է, որ հարցը չի քաղաքականացվում․ «Մենք փնտրում ենք լավագույն առաջարկը․ ով որ կանի լավագույն առաջարկը՝ գին, որակ, ժամկետ և այլն, մենք այդ առաջարկը կընդունենք և կգնանք դրա հետևից»։
Նիկոլ Փաշինյանը մանրամասներ ներկայացրեց երկաթուղու ներդրումների շուրջ ռուսական կողմի հետ 2026 թվականի ապրիլին տեղի ունեցած խոսակցությունը։ Նրա փոխանցմամբ՝ երբ տարածաշրջանը բացվում է, Հայաստանի երկաթուղին չի կարող մնալ անմխիթար վիճակում և պետք է լինի պատշաճ որակական մակարդակի։
Վարչապետի խոսքով՝ արևմտյան ընկերությունները հետաքրքրվածություն ունեն ներդրումներ անելու, սակայն նրանց համար խնդիր է ռուսական կոնցեսիոն կառավարման գործոնը։ Միևնույն ժամանակ, ռուսական կողմը հայտնել է, որ լրացուցիչ ներդրումներ անելը տնտեսապես նպատակահարմար չէ։
«Դե ասում ենք՝ լավ, տնտեսապես նպատակահարմար չի, ուրեմն վաճառեք, օտարեք կոնցեսիայի իրավունքը, ով նպատակահարմար համարի, կամ մենք գնանք մեր գլխի ճարը տեսնենք․․․ Մենք այդպես «սևեր» չենք, որ Ռուսաստանից կոնցեսիան վերցնենք, մենք այդ հարցը ընդհանրապես չէինք էլ բարձրացնի, եթե նման իրավիճակ չլիներ։ Իմ խնդիրն այն է, որ երկաթուղին լինի պատշաճ որակի»,-ասաց նա։
Պատասխանելով 2031 թվականի վերաբերյալ հարցին՝ վարչապետը պարզաբանեց, որ 2026 թվականին ընտրվելու դեպքում 5-ամյա մանդատի ժամկետն ավարտվում է 2031 թվականին․ «Խորհրդարանական ընտրությունների մանդատի ժամկետը 5 տարի է, 2026+5=2031․ բա ի՞նչ թիվ ասեմ, 2041 ասե՞մ»։
Մանրամասները՝ տեսանյութում։
Եվգենյա Համբարձումյան
