13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
ՌԴ ԱԳ փոխնախարարն ասել է, որ Փառուխից Ադրբեջանի ԶՈՒ-ի դուրսբերման մասին հարցը պետք է Բաքվին ուղղել
Քաղաքականություն
29.03.2022 | 15:23
Մոսկվան հուսով է, որ Լեռնային Ղարաբաղում լարվածությունը կկարգավորվի Ռուսաստանի, Ադրբեջանի և Հայաստանի ղեկավարների կողմից 2020 թվականի նոյեմբերի 9-ին ստորագրված եռակողմ հայտարարության հիման վրա, սակայն կարծում է, որ Փառուխի հատվածից ադրբեջանական զորքերի հետքաշման մասին հարցը պետք է ուղղել Բաքվին։ ՏԱՍՍ-ի փոխանցմամբ՝ այս մասին հայտարարել է ՌԴ փոխարտգործնախարար Անդրեյ Ռուդենկոն։
«Մենք ակնկալում ենք, որ այդ ամենը դեռևս կկարգավորվի Հայաստանի, Ադրբեջանի և Ռուսաստանի ղեկավարների 2020 թվականի նոյեմբերի 9-ի եռակողմ հայտարարության շրջանակում»,- ասել է նա։
Նրա խոսքով՝ հարցը՝ արդյո՞ք ադրբեջանական զորքերը դուրս են բերվելու իրենց նախկին դիրքերը, պետք է ուղղել Բաքվին։
«[Ռուսաստանի] Արտաքին գործերի նախարարությունն իր հայտարարությունն է արել՝ մտահոգություն հայտնելով ղարաբաղյան գոտում լարվածության աճի կապակցությամբ»,- ասել է Ռուդենկոն։
Հիշեցնենք, որ մարտի 26-ին ՌԴ Պաշտպանության նախարարությունը հայտարարեց, որ ադրբեջանական զորքերը մտել են Լեռնային Ղարաբաղի տարածքում ռուսական խաղաղապահ զորակազմի պատասխանատվության գոտի։ Կիրակի երեկոյան էլ ՌԴ ՊՆ-ն հայտնեց, որ Ադրբեջանը զորքերը դուրս են եկել Լեռնային Ղարաբաղի Փարուխ բնակավայրից։ Ադրբեջանի ՊՆ-ն ավելի ուշ հերքեց ՌԴ ՊՆ-ի հայտարարությունը՝ պնդելով, որ ադրբեջանական զինված ուժերի ստորաբաժանումները դուրս չեն բերվել բնակավայրից։
Տաթև Ֆռանգյան
