19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Ադրբեջանի ՊՆ-ն արձագանքել է Արցախում իրավիճակի սրման վերաբերյալ ՌԴ ՊՆ-ի հայտարարությանը
Քաղաքականություն
27.03.2022 | 00:22
Ադրբեջանի Հանրապետության պաշտպանության նախարարությունն արձագանքել է Արցախում իրավիճակի սրման վերաբերյալ ՌԴ ՊՆ-ի հայտարարությանը՝ պնդելով, որ Ադրբեջանը հավատարիմ է 2020թ. նոյեմբերի 10-ի եռակողմ հայտարարությանը և չի խախտել դրա որևէ դրույթ:
«ՌԴ Պաշտպանության նախարարության հայտարարությունը հակասում է երկկողմ հարաբերությունների էությանը և 2022 թվականի փետրվարի 22-ին երկու երկրների միջև ստորագրված դաշնակցային փոխգործակցության մասին հռչակագրին»,- ասված է Ադրբեջանի ՊՆ-ի տարածած հաղորդագրության մեջ:
Ադրբեջանի պաշտպանության նախարարությունը կոչ է անում ՌԴ ՊՆ-ին «դուրս բերել հայկական զորքերն Ադրբեջանի տարածքներից, որոնք ճանաչվել են միջազգային հանրության կողմից՝ եռակողմ հայտարարության դրույթներին համապատասխան և խնդրում է չօգտագործել «Լեռնային Ղարաբաղ» անվանումը»։
Հիշեցնենք, որ ՌԴ ՊՆ-ն հայտարարություն էր տարածել, որտեղ ասվում էր, որ մարտի 24-25-ը Ադրբեջանի զինված ուժերը, խախտելով Ռուսաստանի, Հայաստանի և Ադրբեջանի ղեկավարների 2020 թվականի նոյեմբերի 9-ի եռակողմ հայտարարության դրույթները, մտել են Լեռնային Ղարաբաղի տարածքում ռուսական խաղաղապահ զորակազմի պատասխանատվության գոտի և դիտակետ տեղադրել: Ադրբեջանական կողմին զորքը հետ քաշելու կոչ է արվել։
ՌԴ ԱԳՆ-ը ծայրահեղ մտահոգություն է հայտնել Լեռնային Ղարաբաղում լարվածության աճի կապակցությամբ։
Ավելի վաղ Ֆրանսիայի արտաքին գործերի նախարարությունը հայտարարություն է տարածել Լեռնային Ղարաբաղում տեղի ունեցող վերջին զարգացումների առնչությամբ։ Ֆրանսիան կոչ է արել Ադրբեջանին հետ քաշել զորքերը սկզբնական դիրքեր՝ համաձայն 2020 թ. նոյեմբերի 9-ի հայտարարության։
ԱՄՆ Պետդեպարտամենտի մամուլի ծառայության ղեկավարի տեղակալ Ջալինա Պորտերը հայտարարել էր, որ Վաշինգտոնը լրջորեն մտահոգված է Ղարաբաղում ադրբեջանական զորքերի տեղաշարժով՝ տեղի ունեցածը որակելով որպես անպատասխանատու և սադրիչ գործողություններ:
Ադրբեջանի արտաքին գործերի նախարարությունը պատասխանել է Պետդեպարտամենտի մամուլի քարտուղարի տեղակալ Ջալինա Պորտերի՝ Ղարաբաղում իրավիճակի վերաբերյալ հայտարարությանը։
Հիշեցնենք՝ մարտի 25-ին Ադրբեջանի կողմի սադրանքի հետևանքով հայկական կողմից զոհվել է 3 զինծառայող, ևս 15-ը վիրավորվել է։ Այսօր՝ ժամը 11:00-ի սահմաններում, Ադրբեջանի ԶՈւ ստորաբաժանումները կրկին դիմել են ագրեսիվ գործողությունների` տարբեր տրամաչափի հրաձգային զինատեսակների կիրառմամբ փորձելով առաջխաղացում ապահովել Արցախի Հանրապետության արևելյան սահմանագոտու ուղղությամբ, ՌԴ խաղաղապահ զորակազմի պատասխանատվության տակ գտնվող տարածքում: ԱՀ ՊԲ ստորաբաժանումները դիմել են համարժեք գործողությունների` հակառակորդի առաջխաղացումը կասեցնելու նպատակով։
