16.12.2025 | 09:54
Սպասվում է ձյուն և ձնախառն անձրև, օդի ջերմաստիճանը կնվազի
Գումար, հարսնացուի զգեստ, ծրագրավորման դասընթաց. ինչ են խոստանում ժողովրդի կողմն անցած ոստիկաններին. «Փաստ»
21.04.2018 | 09:18
«Փաստ» օրաթերթը գրում է.
Այս օրերին ինչ ասես, որ չեն խոստացել ոստիկաններին ցուցարարների կողմն անցնելու համար: Ամեն ինչ սկսվեց մի հաղորդագրությունից, համաձայն որի՝ սփյուռքը դրամահավաք է սկսել ժողովրդի կողմն անցնող ոստիկաններին գումար տրամադրելու համար: Մասնավորապես ասվում էր, թե արտասահմանի մեր հայրենակիցները ակցիա են ուզում անել, զբաղված են դրամահավաքությամբ։ Ֆեյսբուքյան իր էջում օգտատեր Արա Ներսիսյանը գրել էր, թե երբ կհավաքվի առաջին միլիոն դոլարը, ակցիան կսկսեն: Առաջին ոստիկանը, ով կանցնի ժողովրդի կողմը, կստանա 10 հազար դոլար, իսկ հաջորդները՝ երկուհազարական:
Այս կոչին հետևեցին ոչ պակաս «ախորժալի» առաջարկներ՝ ժողովրդի կողմն անցած ոստիկանի հարսնացուին անվճար նշանադրության զգեստ, ոստիկանին՝ անվճար ծրագրավորման դասընթաց, ոմանք նաև վերապատրաստում և աշխատանքի տեղավորման խնդրի լուծում էին առաջարկում: Մարդ կար, որ ի սրտե հրավիրում էր իր տուն՝ ոստիկանի համար սեղան գցելու նպատակով: Իհարկե, բավական գայթակղիչ առաջարկներ էլ կային, օրինակ՝ մերսման ծառայություններ իրականացնող սրահի կողմից անվճար սպասարկում և այլն:
Հատվածներ ֆեյսբուքյան գրառումներից. «Այն ոստիկանը, ով կանցնի ժողովրդի կողմը, խոստանում եմ ծրագրավորում սովորեցնել։ Կփորձեմ»:
«Որոշեցի ես էլ օգնեմ ցուցարարներին ու նաև ոստիկաններին: Ժողովրդի կողմն անցած ոստիկաններին՝ զեղչեր ու բոնուսներ»:
«Ժողովրդի կողմն անցած առաջին 1000 ոստիկանի խոստանում եմ բերել Գյումրի ու լավ սեղան քցեմ առաջները Արագածի փեշերին»:
«Olympeah նորաձևության սրահը միանում է ակցիային: Այն 10 չամուսնացած ոստիկանները, որոնք առաջինը կմիանան ժողովրդին, խոստանում ենք իրենց հարսնացուների նշանադրության զգեստներն անվճար կարել (կտորը նույնպես կտրամադրվի մեր կողմից)»:
«wоw effect armenia կահույքի արտադրությամբ զբաղվող ընկերություն: Բոլոր այն ոստիկանները, ովքեր կանցնեն ժողովրդի կողմը, կստանան անվճար 3DMAX և ArchiCAD սովորելու հնարավորություն, ու կանցնեն աշխատանքի մեզ մոտ: P.S. Ներկայանալ ճղած ՈՒԴՈ–ներով»:
«Այն ոստիկանը, ով առաջինը կանցնի ժողովրդի կողմը, խոստանում եմ անվճար կբուժեմ իր ու իր ընտանիքի ատամները»:
«Այն ոստիկանները, ովքեր իրենց վահանները վայր դնելով կմիանան ժողովրդին և կապացուցեն, որ իրենք էլ ՀԱՅԿԻ ու ՎԱՀԱԳՆԻ, ՆԺԴԵՀԻ ու ՉԱՈՒՇԻ արժանի ժառանգորդներն են, որպես հանդիսավար խոստանում եմ բարձր մակարդակով կազմակերպել իրենց կամ իրենց զավակների հարսանեկան, մկրտության առիթները»:
Իհարկե այս առաջարկներին հետևել են նաև ավելի զավեշտալիները: Օրինակ, օգտատերերից մեկն էլ խոստացել է ժողովրդի կողմն անցած 10 ոստիկաններին «Փոքրիկ ոստիկանը» պատկերազարդ, ձայնային ազդանշաններ ունեցող հեքիաթի գիրքը նվիրել:
Միջոցառումների կազմակերպում էջն էլ գրել է, թե առաջին ոստիկանը, ով կանցնի ժողովրդի կողմը, կստանա անվճար հարսանեկան նկարահանում GA Pro Duction– ի կողմից:
Անկասկած, նման կոչերի շնորհիվ որոշ մարդիկ կամ ծառայություններ մատուցող ընկերություններ լրացուցիչ գովազդվելու հնարավորություն ունեցան:
Առավել մանրամասն՝ թերթի այսօրվա համարում:
