06.10.2026 | 21:16
Ավանեսյանը այցելել է Շաքիում վիրավորված Անի Ավետիսյանի ընտանիքին
Արցախի 220 ընտանիք տունը կորցրել է. 20 միլիոն դրամ փոխհատուցում պիտի տրվեր մեզ. Արցախից տեղահանված․ ՏԵՍԱՆՅՈՒԹ
Հասարակություն
02.03.2022 | 11:24
Հայաստանում Արցախի Հանրապետության ներկայացուցչության առջև այսօր բողոքի ակցիա են իրականացնում Արցախից տեղահանված մի խումբ քաղաքացիներ, որոնք պատերազմում կորցրել են հարազատներին: Նրանք պահանջում են լուծել իրենց բնակարանով ապահովելու հարցը:
«Այստեղ այն մարդիկ են, որոնք տուն ու տեղ են կորցրել և դրա հետ մեկտեղ՝ ընտանիքի մի անդամին»,- լրագրողների հետ զրույցում նշեց բողոքի ակցիայի մասնակից՝ հադրութցի Վահիդ Սահակյանը, ով այս պատերազմում կորցրել է որդուն՝ 19-ամյա Ժորա Սահակյանին:
«Սեպտեմբերի վերջին հանդիպել ենք նախագահ Արայիկ Հարությունյանի հետ, մեզ հուզող հարցերը բարձրացրել, խոստացել են, որ հոկտեմբեր-նոյեմբեր ամիսներին մեր հարցին լուծում կտրվի, այսինքն՝ որոշումը կլինի, որ բնակարանային պայմաններով ապահով են ՀՀ-ում:
Նորից նոյեմբեր ամսին, ոչ մի պատասխան չստանալով, խնդրել ենք հանդիպում կազմակերպել ԱՀ նախագահի հետ. ԱՀ ներկայացուցչությունում հանդիպել ենք: Նա ասաց՝ մինչև դեկտեմբերի 20-ը ձեր հարցը վերջնական լուծում կստանա . 20 միլիոն դրամի չափով փոխհատուցում էր տրվելու սերտիֆիկատի ձևով, այդ գումարը պետք է հատկացներ ՀՀ կառավարությունը»- նշեց Սահակյանը՝ հավելելով, որ նախաձեռնող խումբը բաղկացած է հինգ անձից, և նրանք խոսում էին մոտավորապես 220 ընտանիքի անունից, որոնք կորցրել են ամեն ինչ, նաև ընտանիքի անդամներից մեկին:
«Դեկտեմբերին ԱՀ ներկայացուցչության միջոցով իմացել ենք, որ հունվարի կեսերին նորից որոշում կլինի. հունվարի կեսերին պատասխանում են, թե որոշումը փետրվարի 12-14-ը լինելու է: Այսօր մարտի 2-ն է: Փետրվարի 17-ին ՀՀ կառավարությունը որոշում է հանել Արցախի որոշ շրջաններից տեղահանվածների համար, որը մեզ չի վերաբերում:
Այսօր անորոշությունն ուղղակի խեղդում է մեզ. եկել ենք, որպեսզի պարզենք՝ այս խաբեության վերջը ե՞րբ է տրվելու»,- դժգոհեց տեղահանված հադրութցին՝ հավելելով՝ էսօր ստիպում են, որ մենք՝ զոհվածի ծնողներս, ցավը մեր սրտում, հասնենք դեսպանատուն, շտաբ, նախագահի ընդունարան:
Մանրամասները՝ տեսանյութում:
