14.09.2026 | 10:58
Բեռլինում նշվել է Հայաստանի անկախության 35-ամյակը․ ընդգծվել է ՀՀ–Գերմանիա ռազմավարական գործընկերության խորացումը
Բաքվում ԱՄՆ դեսպանը կրկին պարզաբանել է՝ ինչու Ադրբեջանը չի հրավիրվել «Հանուն ժողովրդավարության» գագաթնաժողովին
Քաղաքականություն
16.02.2022 | 23:27
Ադրբեջանում շարունակում են խանդով քննարկել դեկտեմբերի 9-10-ը ԱՄՆ նախագահ Ջո Բայդենի նախաձեռնությամբ անցկացված «Հանուն ժողովրդավարության» գագաթնաժողովն ու այդ միջոցառմանը Հայաստանի մասնակցությանը։ Հիշեցնենք՝ պաշտոնական Բաքուն մասնակցության հրավեր չէր ստացել։
Գագաթնաժողովի մասին հարցին այսօր հրավիրված ճեպազրույցում անդրադարձել է նաև Ադրբեջանում ԱՄՆ դեսպան Լի Լիտցենբերգերը։ Ադրբեջանական «Թուրան»-ի փոխանցմամբ՝ դեսպանը նշել է, որ «Հանուն ժողովրդավարության» գագաթնաժողովի մասնակիցներն ընտրվել են՝ հաշվի առնելով այս կամ այն երկրում ժողովրդավարության վիճակը։
«Մենք հուսով ենք, որ ապագայում Ադրբեջանը կհայտնվի մասնակիցների շրջանում, սակայն դրա համար անհրաժեշտ է որոշակի առաջընթաց այնպիսի հարցերում, ինչպիսին են հիմնարար ազատությունները, քաղաքացիական հասարակության հնարավորությունները, մարդու իրավունքների հարգումը»,- ասել է ԱՄՆ դեսպանը։
Պատասխանելով հարցին՝ ինչո՞ւ է գագաթնաժողովին հրավիրվել Հայաստանը, իսկ Ադրբեջանը հրավեր չի ստացել, ամերիկացի դիվանագետը նշել է, որ հրավերը կախված է եղել որոշակի ժողովրդավարական բարեփոխումների առկայությունից․ այն կախված չէ երկրի՝ այս կամ այն ռազմական կամ քաղաքական կազմակերպությանն անդամակցությունից։
Հիշեցնենք, որ Ադրբեջանը, Թուրքիան, ՌԴ-ն և Իրանը չէին հրավիրել գագաթնաժողովին։ Հայաստանի հարևաններից գագաթնաժողովին մասնակցում էր միայն Վրաստանը։
Էմմա Չոբանյան
