04.04.2026 | 20:03
ՃՏՊ՝ հրդեհի բռնկմամբ
Նախարարը՝ սկանդալի կենտրոնում. Factor TV-ի հրապարակման հետքերով փաստաբաններն ուսումնասիրություն են կատարել. ՏԵՍԱՆՅՈՒԹ
Քաղաքականություն
26.11.2024 | 20:46
Փաստաբանների պալատի ակումբի համակարգող խումբը Factor TV-ի հրապարակման հետքերով է գնացել և, իրենց դիտարկմամբ, ֆինանսների նախարար Վահե Հովհաննիսյանի՝ ենթադրյալ կոռուպցիոն ռիսկեր պարունակող այլ գործողությունների սխեմա բացահայտել։ Մասնավորապես, դեռևս օգոստոսին Factor TV-ի իրականացրած ուսումնասիրությունից պարզ էր դարձել, որ հուլիսի 27-ին ՀՀ Ֆինանսների նախարարության աշխատակիցների համար կազմակերպված թիմակառուցողության խաղ-վարժանքներն անցկացվել են նախարար Վահե Հովհաննիսյանի առանձնատան տարածքում գործող «Վարդենի» հյուրատանը։
Ավելին, նախարարը հաստատել էր, որ պատահական չի ընտրվել «Վարդենի» հյուրատունը։ Փաստացի, ֆինանսների նախարարն իր գերատեսչության խաղ-վարժանքների համար 1 միլիոն դրամ գումար է հատկացրել և այն անցկացրել իր մտերիմին պատկանող հյուրատանը։
Factor TV-ի հրապարակումից հետո Հակակոռուպցիոն կոմիտեն սկսել էր ստուգել Վահե Հովհաննիսյանի եկամուտները, իսկ Կոռուպցիայի կանխարգելման հանձնաժողովը՝ ուսումնասիրություն էր սկսել, երկու գերատեսչություններն էլ դեռևս շարունակում են ուսումնասիրությունները։ Արդեն այսօր Հովհաննիսյանի գործունեության մասին նոր մանրամասներ է հաղորդում փաստաբան Հարութ Ակլունցը։
Սակայն սա դեռ միայն սկիզբն է՝ ասում են Փաստաբանների պալատի ակումբի համակարգող խմբի անդամները և այլ փաստեր մատնանշելով՝ ընդգծում, որ Հովհաննիսյանը մի շարք կոռուպցիոն գործողություններ է իրականացրել նաև հայտարարագրերում։
Հայտարարագրված արժեթղթերում փաստաբանները նաև մի քանի այլ անճշտություններ կամ միտումնավոր չարաշահումներ են ընդգծում։
Փոխառումների հետ կապված ևս բացահայտումներ էր կատարել Փաստաբանների պալատի ակումբի համակարգող խումբը՝ նշելով, որ այս ամբողջ փաթեթն առաջիկայում, որպես հանցագործության մասին հաղորդում, ներկայացվելու է Գլխավոր դատախազություն, քանի որ հանցակազմի մի քանի հատկանիշներ կան։ Այս ամենը համադրելով՝ Փաստաբանների պալատի ակումբի համակարգող խումբն նախարար Վահե Հովհաննիսյանին առաջարկում է հրաժարական ներկայացնել։
Հրապարակված տեղեկությունների և նախարարի կողմից ներկայացրած հայտարարագրերում անճշտությունների մասով Factor TV-ն մեկնաբանություն խնդրեց Ֆինանսների նախարարությունից։ Նախարարի մամուլի խոսնակ Ինգա Գալուստյանը փոխանցեց, որ հայտարարագրերում պարզապես անճշտություններ են եղել, որոնց շտկման համար արդեն դիմել են Կոռուպցիայի կանխարգելման հանձնաժողով։
«Իսկ «Վարդենի» հյուրատան և այլնի մասով՝ Հովհաննիսյանն արդեն պարզաբանում ներկայացրել է»,- նշեց Գալուստյանը։
Մանրամասները՝ տեսանյութում։
Ռոզա Վարդանյան
