07.10.2026 | 14:29
Սեպտեմբերին Հայաստան է այցելել 290 հազար զբոսաշրջիկ․ Պապոյան
ՄԻԵԴ-ը Թուրքիային ծանուցել է Անկարայի դեմ 1000 նոր դիմում-բողոքների մասին
Քաղաքականություն
26.11.2024 | 21:46
Մարդու իրավունքների եվրոպական դատարանը (ՄԻԵԴ) Անկարային ծանուցել է հինգ գործերով 1000 նոր դիմումների մասին, որոնք առնչվում են հանգուցյալ կրոնական գործիչ Ֆեթուլլահ Գյուլենի շարժմանն անդամակցելու վերաբերյալ ByLock սմարթֆոնի հավելվածի օգտագործման հետ կապված գործերին, գրում է Turkish Minute-ը։
2023 թվականի սեպտեմբերին մի գործի վերաբերյալ կարևոր վճռի մեջ ՄԻԵԴ-ը գտել էր, որ սմարթֆոնի հավելվածի օգտագործումը հուսալի ապացույց կամ քրեական հանցագործություն չէ:
ByLock-ը, որը ժամանակին լայնորեն հասանելի էր համացանցում, համարվում էր գաղտնի հաղորդակցման գործիք Գյուլենական շարժման կողմնակիցների շրջանում՝ կրոնական խմբավորում, որն արգելվել է Անկարայի կողմից 2016 թվականի հուլիսի 15-ի հեղաշրջման փորձից հետո, չնայած որևէ ապացույց չկա, որ ByLock-ի հաղորդագրությունները կապված են ձախողված հեղաշրջման հետ:
Գյուլենական շարժումը, որը ոգեշնչված է Ֆեթուլլահ Գյուլենի կողմից, Թուրքիայի կառավարության և նախագահ Ռեջեփ Թայիփ Էրդողանի կողմից մեղադրվում է 2016 թվականի ձախողված հեղաշրջման կազմակերպման մեջ և պիտակվում է որպես «ահաբեկչական կազմակերպություն», չնայած շարժումը հերքում է իր մասնակցությունը հեղաշրջման փորձին կամ ահաբեկչական գործունեությանը։
ՄԻԵԴ-ի վերջին ծանուցումը ներառում է հինգ գործ՝ Քըլըչարսլանն ընդդեմ Թուրքիայի և 199 այլնի, Չելեբին ընդդեմ Թուրքիայի և 199 այլնի, Թյուքյըլմազն ընդդեմ Թուրքիայի ու 199 այլնի, Քուզուջուն ընդդեմ Թուրքիայի և 199 այլնի, Բաշաղուլն ընդդեմ Թուրքիայի և 199 այլնի։ Այս գործերը, որոնք ներկայացվել են Ստրասբուրգի դատարան 2018-2023 թվականներին, վերաբերում են ահաբեկչության մեջ մեղադրվող Գյուլենի շարժմանն անդամակցելուն։ Նախկինում դատարանը կառավարությանը ծանուցել էր նմանատիպ հիմքերով ներկայացված 3000 դիմումների մասին՝ 2023 թվականի դեկտեմբերին, 2024 թվականի ապրիլին և 2024 թվականի հուլիսին։
Դիմումատուները պնդում են, որ իրենց դատավճիռները, որոնք հիմնված են ByLock-ի ենթադրյալ օգտագործման վրա, խախտում են Մարդու իրավունքների եվրոպական կոնվենցիայի (ՄԻԵԴ) սկզբունքները, մասնավորապես, 7-րդ հոդվածը (պատիժ՝ առանց օրենքի) և 6-րդ հոդվածի 1-ին մասը (արդար դատաքննության իրավունք):
Հիշեցնենք, որ վերջերս ՄԻԵԴ-ը Թուրքիային պարտավորեցրել էր փոխհատուցում վճարել 468 անձի՝ որոշելով, որ նրանց կալանավորումը 2016 թվականի հուլիսին հեղաշրջման ձախողված փորձից հետո «ապօրինի» է եղել՝ «հիմնավոր կասկածների» բացակայության պատճառով։
Թարգմանությունը՝ Էմմա Չոբանյանի
