«Արցախում հայկական մշակութային ժառանգության վերացման Ադրբեջանի քաղաքականությունը. ինչպես կանխել ու պայքարել» թեմայով քննարկման ժամանակ ՄԻԵԴ-ում Հայաստանի ներկայացուցիչ Եղիշե Կիրակոսյանը հիշեցրեց, որ Արդարադատության միջազգային դատարանը 2021թ. դեկտեմբերի 7-ին կայացրեց որոշում՝ կիրառելով նախնական պայմանական հրատապ միջոցներ Ադրբեջանի նկատմամբ:
«Այդ միջոցներն ուղղված էին կանխելու ատելությունը կամ հայատյաց խոսքը, այդ թվում նաև բարձրաստիճան պաշտոնատար անձանց կողմից, կանխելու և պատժելու հայկական մշակութային ժառանգության օբյեկտների ոչնչացումը կամ վնասումը: Կարևորագույն պարտավորություն էր դրվել Ադրբեջանի վրա չձեռնարկել այնպիսի քայլ, որը կարող է ծանրացնել կամ բարդացնել կողմերի միջև առկա վեճը:
Ցավոք, Ադրբեջանի գործելաոճը, որ տեսնում ենք, հատկապես վերջին զարգացումները, ոչ այլ ինչ են, քան այս կետերի խախտում:
Այս խախտումների մասին Արդարադատության դատարանին ծանուցելու հնարավորություն ունենք, և այժմ այդ մասին քննարկումներ են ընթանում»,- նշեց Կիրակոսյանը:
Թեմայի շուրջ իրենց դիտարկումները ներկայացրին նաև Արցախի մարդու իրավունքների պաշտպան Գեղամ Ստեփանյանը և «Իրավունքների պաշտպանություն առանց սահմանների» ՀԿ-ի նախագահ Արաքս Մելքոնյանը:
Մանրամասները՝ տեսանյութում:
