Քաղաքականություն
08.02.2022 | 16:57Եվրասիական տարածությունում ստեղծված ռազմաքաղաքական իրադրությունը հուշում է, որ առաջիկա տարիներին տեղափոխվելու ենք տարածաշրջանում ու, առհասարակ, աշխարհում նոր վերախմբավորումների, արտաքին քաղաքական խմբագրումների, դաշինքների իմաստավորման , ինտեգրացիոն նոր նախագծերի ու բաժանարար գծերի խորացման նոր ժամանակահատված, Ազգային ժողովում հայտարարեց «Պատիվ ունեմ» խմբակցության պատգամավոր Տիգրան Աբրահամյանը:
Պատգամավորի դիտարկմամբ՝ Հայաստանը ստեղծված իրադրությունը ու առաջիկա գործընթացները խորն ուսումնասիրելու, իրադրությունը ճշգրիտ գնահատելու, ախտորոշելու կարևոր խնդիր ունի:
«Դիվանագիտական ջանքեր գործադրելուց զատ, անվտանգային համակարգը պետք է նախապատրաստել երկարատև դիմակայությունների շրջափուլի, իսկ դա ենթադրում է համակարգի վերականգնում, արդիականացում ու կանխատեսելի նոր սպառնալիքներին դիմակայության իմունիտետի և կենսունակության ապահովում:
Հայաստանի իշխանությունների ներկայիս կեցվածքը, անտարբերությունը, տեղ-տեղ գործելու ու բացառապես իշխանության պահպանության դիքրերից հանդես գալու քաղաքականությունը ոչ միայն խորացնում է Թուրքիայից ու Ադրբեջանից եկող սպառնալիքները, այլ, վստահաբար, բերելու է նոր ռիսկերի, որոնք կառավարելուն ու չեզոքացնելուն ուղղված որևէ գործնական քայլ այս իշխանությունը չի գործադրում…
Եթե իշխանությունում կարծում են, թե Թուրքիայի ու Ադրբեջանի հետ բանակցությունների պատրաստակամությունը, Հայաստանի արտաքին քաղաքական օրակարգի առաջնահերթություններից հետ կանգնելը ու միակողմանի զիջումների գնալը բավարարելու է դրանց քաղաքական ախորժակը, ապա սխալվում են:
Այս իշխանությունը երկիրը գլորում է իներցիայի, անորոշությունների ու անկանխատեսելի գործընթացների դաշտ, որի պայմաններում հայկական շահի ապահովումն ու հայի ֆիզիկական գոյությունը լուրջ սպառնալիքների տակ է», – հայտարարեց Տիգրան Աբրահամյանը:
Մանրամասները՝ տեսանյութում:
