Խնամիներն ու բարեկամները չեն կարող նշանակվել դպրոցի տնօրեն կամ վարչական ղեկավար․ ԿԳՄՍ փոխնախարար․ ՏԵՍԱՆՅՈՒԹ

ԱԺ գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովում քննարկվում է «Հանրակրթության մասին» օրենքում փոփոխությունների նախագիծը:

ԿԳՄՍ փոխնախարար Ժաննա Անդրեասյանը ներկայացրեց նախագծի հիմնական փոփոխությունները:

Նրա խոսքով՝ վերանայվել է հանրակրթական ծրագրի սահմանումը, որոշ խմբագրական փոփոխություններ են արվել: Տևական ժամանակ քննարկվել ու քննադատության էին արժանացել դպրոցների կառավարման հարցում փոփոխությունները.

«Քննարկեցինք պետական ուսումնական հաստատության գործունեության ղեկավարման ձևաչափը, մասնավորապես՝ ուսումնական գործընթացի և վարչատնտեսական գործընթացի մասով: Հստակ ամրագրվել ենք, որ վարչատնտեսական գործընթացի կառավարումն իրականացնում է ուսումնական հաստատության համակարգողը կամ լիազոր մարմնի կողմից պատվիրակված իրավաբանական անձը՝ օրենսդրությամբ սահմանված կարգով…

Հստակեցվել են նաև խորհրդի գործառույթները, ներառվել նոր գործառույթներ, մասնավորապես, խորհուրդը լիազորված մարմնին նաև առաջարկություններ կարող է ներկայացնել ուսումնական հաստատության գործունեության բնագավառին, խնդիրներին համապատասխան ու հստակեցվել է, թե որ դեպքերում կարող են տնօրենին անվստահություն հայտնել: Հիմք կարող են ընդունվել լիազոր մարմնի սահմանած կատարողական ցուցանիշները: Այսինքն, զարգացման ծրագրին հետևելու են կատարողական ցուցանիշներով ու այդ ցուցանիշները չկատարելու դեպքում կարող է անվստահության գործընթաց սկսել:

Մանկավարժի որակավորման պահանջը տնօրեն դառնալու համար վերանայել են ու ամրագրել կրթության ոլորտի բարձրագույն կրթության պահանջ: Կարևոր հստակեցում է արվել, թե ինչպես է լինելու տնօրենի ընտրելու մրցույթը»,- նշեց Ժաննա Անդրեասյանը:

Նա նաև ընդգծեց, որ հստակ թվարկվել են տնօրենի ու համակարգողի լիազորություններն ու պարտավորությունները. «Ներառել ենք շահերի բախման գործընթացը կանխելու դրույթը, որ նույն պետական ուսումնական հաստատության տնօրեն և համակարգող չեն կարող առաջադրվել, նշանակվել միմյանց հետ մերձավոր ազգակցությամբ կամ խնամիությամբ կապված անձինք»:

Մանրամասները՝ տեսանյութում: