05.11.2026 | 19:04
Գուրգեն Արսենյանը պարգևատրվել է ՌԴ ԱԳՆ «Փոխգործակցության համար» կրծքանշանով
Ինչպե՞ս կարդալ 21-րդ դարում․ շուրջ 700 ուսուցիչ մասնակցել է մասնագիտական քննարկումների
Հասարակություն
05.10.2026 | 18:19
Երևանի պետական համալսարանում շուրջ 700 ուսուցչի մասնակցությամբ անցկացվել է «Ընթերցանությունը բոլոր դասերին. ճանաչողությունից դեպի մտածողություն» խորագրով համաժողովը։ Մասնագիտական քննարկումների ընթացքում անդրադարձ է կատարվել 21-րդ դարում ընթերցանության, թվային միջավայրում տեքստերի ընկալման և PISA 2025-ի մարտահրավերներին։
ԿԳՄՍՆ-ի հաղորդագրությունը՝ ստորև․
«Ընթերցանությունը բոլոր դասերին. ճանաչողությունից դեպի մտածողություն» խորագրով ուսուցչական համաժողովի շրջանակում կազմակերպվել են նաև մասնագիտական քննարկումներ, թեմատիկ աշխատարաններ:
Պանելային քննարկումները վերաբերել են ընթերցանության խթանմանը. որպես բանախոսներ՝ հանդես են եկել կրթության փորձագետներ, դասագրքերի հրատարակիչներ և հեղինակներ, կրթության և մշակույթի ոլորտի ներկայացուցիչներ։
«Ինչ է նշանակում կարդալ 21-րդ դարում. տեքստից մինչև տվյալներ» թեմայով պանելային քննարկումը վարել է ԿԳՄՍՆ հանրակրթության վարչության պետ Թամարա Սարգսյանը: Մասնակցել են ԿԶՆԱԿ հիմնադրամի տնօրեն Ժաննա Հարությունյանը, բանասիրական գիտությունների թեկնածու Վահրամ Դանիելյանը և «Զանգակ» հրատարակչության հիմնադիր տնօրեն Սոկրատ Մկրտչյանը:
Համաժողովի երկրորդ հատվածում մասնակիցներն աշխատել են չորս թեմատիկ բաժիններում՝ անդրադառնալով դասագրքի ընթերցման առանձնահատկություններին, գեղարվեստական տեքստի ընկալմանն ու հեղինակային խոսքին, PISA 2025-ի համատեքստում ընթերցանության մարտահրավերներին, ինչպես նաև թվային միջավայրում տեքստերի ընկալման և ընթերցանության հարցերին։
ԿԳՄՍ նախարարությունն ուսուցչական համաժողովն անցկացրել է ԵՄ աջակցությամբ` ՅՈւՆԻՍԵՖ-ի, ԵՊՀ-ի և ԿԶՆԱԿ-ի հետ համագործակցությամբ: Երևանի պետական համալսարանում կազմակերպված համաժողովին մասնակցել է շուրջ 700 ուսուցիչ՝ Երևանից և մարզերից»:
