Երևանյան ցույցերի առթիվ միջազգային մամուլի արձագանքը միանշանակ չէ

Միջազգային մամուլը բավական տարբերվող գնահատականներով է անդրադարձել է այս օրերի երևանյան իրադարձություններին․ խոսքը ռուսական ու Արևմտյան մամուլի անդրադարձի մասին է։

Ռուսական ընդդիմադիր «Ռոսբալտը», օրինակ, գրում է․ «Ռուսաստանn օգնեց Սարգսյանին, որ իրեն փոխարինի իրենով: Հայաստանի՝ ոչ այնքան լայն աջակցություն ունեցող նախկին նախագահը վաղը կդառնա երկրի վարչապետ: Սերժ Սարգսյանը, որին Հայաստանի Սահմանադրությունը թույլ չի տալիս առաջադրվել նախագահության երրորդ ժամկետի համար, իզուր չէր շտապ կարգով փոխում երկրի մայր օրենքը: Չցանկանալով հեռանալ քաղաքական Օլիմպոսից՝ նա ընդամենը սահմանադրական բարեփոխում անցկացրեց, որով Հայաստանը նախագահական կառավարման համակարգից անցավ խորհրդարանականի»:

Այսպիսով, ըստ «Ռոսբալտ»-ի՝ «Այլևս կասկած չի մնում, որ Սարգսյանը իրեն համապատասխանեցրեց Սահմանադրությունը»։

Ռուսական «Московский комсомолец»-ը մինչդեռ գրել է, որ «Հայաստանում մեկնարկել է Մայդան»՝ եզրակացնելով, որ երևանյան ցուցարարները «նոր վարչապետ են տեսնում Նիկոլ Փաշինյանին»:

Ուկրաինական «Новое время» կայքն անդրադարձել է ոստիկանների և ցուցարարների միջև Բաղրամյան պողոտայում տեղի ունեցած բախումներին՝ նշելով, որ բախումները տեղի են ունեցել Փաշինյանի և աջակիցների՝ ոստիկանական պատնեշն անցնելու փորձի հետևանքով:

«Բի-Բի-Սի»-ի ռուսական ծառայությունը՝ անդրադառնալով Հայաստանում սկսված բողոքի ցույցերին՝ գրում է․ «Եթե Սարգսյանը դառնա վարչապետ, կշարունակի իշխանավարել մինչև 2022 թվականը»:

«Ֆրանսպրեսը», Սերժ Սարգսյանին բնորոշելով որպես ռուսամետ առաջնորդ, հաղորդում է, թե նա պատրաստվում է «ատամներով կառչած մնալ իշխանությանը, այս անգամ՝ վարչապետի պաշտոնում»։

Գերմանական «Դոյչե Վելլեն» զրուցել է Նիկոլ Փաշինյանի հետ, ով փոխանցել է, թե «Սերժ Սարգսյանը ձեռնարկել է հնարավոր բոլոր քայլերը սեփական իշխանությունը վերարտադրելու համար»: «Փաստացի ընդդիմությունը օգտվեց անիշխանության այս պատուհանից», – եզրակացրել է «Դոյչե վելլեն»:

Worldbulletin.net կայքը հատուկ շեշտադրում է կատարել Սարգսյանի ռուսամետ քաղաքական գործիչ լինելու վրա՝ գրելով, որ հազարավոր ցուցարարներ ակցիաներ են սկսել ընդդեմ վարչապետի թեկնածու Սերժ Սարգսյանի:

Միջազգային լրաքաղը՝ Մարինե Խառատյանի