26.11.2024 | 23:20
Ադրբեջանում պահեստազորի սպաները բողոքի ակցիա են անցկացրել՝ պահանջելով իրենց հասանելիք վճարումները
Արևմտյան առաջնորդները միասնականություն են հայտնել ընդդեմ ՌԴ սպառնալիքի
Քաղաքականություն
25.01.2022 | 12:41
Երկուշաբթի երեկոյան ԱՄՆ նախագահ Ջո Բայդենն Ուկրաինայի հետ սահմանին տիրող իրավիճակը քննարկել է Մեծ Բրիտանիայի վարչապետ Բորիս Ջոնսոնի, Ֆրանսիայի նախագահ Էմանուել Մակրոնի, Իտալիայի վարչապետ Մարիո Դրագիի, Գերմանիայի կանցլեր Օլաֆ Շոլցի, Լեհաստանի նախագահ Անջեյ Դուդայի և ՆԱՏՕ-ի գլխավոր քարտուղար Յենս Ստոլտենբերգի հետ։ Տեսազանգին մասնակցել են նաև Եվրահանձնաժողովի նախագահ Ուրսուլա ֆոն դեր Լյայենը և Եվրոպական խորհրդի նախագահ Շառլ Միշելը, գրում է BBC-ն։
«Շատ, շատ լավ հանդիպում։ Լիակատար միակարծություն եվրոպացի բոլոր առաջնորդների հետ»,- մեկնաբանել է Բայդենը։
ՆԱՏՕ-ի ղեկավար Յենս Ստոլտենբերգը բանակցություններից հետո նախազգուշացրել է Ռուսաստանին, որ Ուկրաինայի դեմ ագրեսիան թանկ կարժենա, Ջոնսոնը նշել է «միջազգային միասնականության կարևորությունը Ռուսաստանի կողմից աճող թշնամանքի պայմաններում», իսկ Օլաֆ Շոլցը Մոսկվային կոչ է արել տեսանելի քայլեր ձեռնարկել՝ լարվածությունը թուլացնելու համար։
Շուրջ 8500 ամերիկացի զինծվորականներ բարձր պատրաստության վիճակի են բերվել Արևելյան Եվրոպայում հնարավոր տեղակայման համար՝ ռուս-ուկրաինական սահմանի երկայնքով աճող լարվածության ֆոնին: ԱՄՆ Պաշտպանության նախարարությունը պարզաբանել է, որ նման որոշում դեռ չի կայացվել, սակայն զինվորականները կարող են ուղարկվել հինգ օրվա ընթացքում։
«Սա հստակ ազդանշան է Պուտինին, որ մենք լրջորեն ենք վերաբերվում ՆԱՏՕ-ին մեր հավատարմությանը»,- ասել է Պենտագոնի խոսնակ Ջոն Քիրբին։
Արեւմտյան երկրները վերջերս մտավախություն են հայտնել, որ Ռուսաստանը մտադիր է ներխուժել Ուկրաինայի տարածք։ ՌԴ իշխանությունները հերքում են այդ մեղադրանքները, բայց, միևնույն ժամանակ, պահանջում են իրավաբանորեն ամրագրել դեպի արևելք հետագա ընդլայնման և Ուկրաինային իր շարքերն ընդունելուց ՆԱՏՕ-ի հրաժարումը։ ՆԱՏՕ-ի ղեկավարությունը երկուշաբթի հայտարարել է, որ զորքերը պատրաստի վիճակի է բերել և լրացուցիչ նավեր ու կործանիչներ է ուղարկում Արևելյան Եվրոպա:
Ֆրանսիան հայտարարել է, որ չորեքշաբթի բանակցություններ կանցկացվեն Ռուսաստանի, Ուկրաինայի, Ֆրանսիայի և Գերմանիայի միջև՝ փորձելու ելք գտնել ներկայիս ճգնաժամից։ Ֆրանսիայի նախագահի օգնականի խոսքով՝ Էմանուել Մակրոնը վստահ է, որ միշտ պետք է «դիվանագիտության տեղ» լինի և ապաէսկալացիայի համար ուղի գտնվի։
Տաթև Ֆռանգյան
