Քաղաքականություն
24.01.2022 | 14:36«ՄԻՊ ինստիտուտը Հայաստանում էվոլյուցիոն ճանապարհով զարգացել է»,- Ազգային ժողովում ՄԻՊ-ի թեկնածու Քրիստինե Գրիգորյանի ընտրության հարցի քննարկման ժամանակ նշեց «Հայաստան» խմբակցության պատգամավոր Արամ Վարդևանյանը՝ հավելելով, որ ՄԻՊ ինստիտուտը պետք է կարևորել և հնարավորինս կատարելագործել:
«ՄԻՊ Արման Թաթոյանի աշխատանքին գնահատական տալու անհրաժեշտություն չկա, որովհետև միջազգային հանրությունն է գնահատական տվել նրա գործունեության վերաբերյալ: Մեր բոլոր ՄԻՊ-երը, իրենց կարևոր արձանագրումներով և ձեռքբերումներով հանդերձ, նման աստիճանի բարձր մակարդակ չէին կարողացել ապահովել: Շատ կարևոր է, որ ՄԻՊ-ը ո՛չ իշխանությանը պաշտպանելու դիրքերում էր գտնվում, ո՛չ էլ ընդդիմությանը պաշտպանելու դիրքերում»,- նշեց Վարդևանյանը:
Պատգամավորը նշեց, որ ՄԻՊ թեկնածու Քրիստինե Գրիգորյանի թեկնածության քննարկման ժամանակ հնչում է հայտարարություն, որ ՄԻՊ ինստիտուտին պետք է օգնել, ամեն ինչ անել, որ ՄԻՊ-ը հաջողի: «Բայց ես հիշում եմ, որ երբ այս ամբիոնից ելույթ էր ունենում լավագույն ՄԻՊ-երից մեկը՝ Արման Թաթոյանը, գնահատականներ ու հարցադրումներ էին հնչում՝ դեմքի հատուկ ջղային արտահայտությամբ, իսկ թե ինչի համար էր դա արվում, դժվարանում եմ հասկանալ: Այսինքն՝ դա արվում էր նրա համար, որ նա բարձրաձայնում էր 44-օրա պատերազմում տեղի ունեցած գրեթե բոլոր հումանիտար միջազգային հանցագործությունների մասի՞ն., թե՞ նրա համար, որ Արման Թաթոյանը ցանկացած մարդու իրավունքները պաշտպանելու լրջագույն, դրական, բարձր նշաձող էր սահմանել»:
Մանրամասները՝ տեսանյութում:
