Կարևոր է, որ Ռուսաստանում հասարակությունը հասկանա՝  այլընտրանք կա. Միխայիլ Խոդորկովսկի (տեսանյութ)

«Ես ցանկանում եմ, որ բոլորը կարողանան հպարտանալ իմ երկրով». այս մասին Գերմանիայում ընթացող «Գլոբալ-մեդիա ֆորումի» ժամանակ, որը նախաձեռնել է գերմական հեղինակավոր «Դոյչե վելե» ռադիոկայանը, ասաց «Բաց Ռուսաստան» շարժման հիմնադիր Միխայիլ Խոդորկովսկին։ 

Հարցին՝ արդյոք ՌԴ-ում հասարակությունն այդքան իշխանամետ է, որ ՌԴ նախագահ Վլադիմիր Պուտինը 86 տոկոս ձայն է վայելում ընտրողների շրջանում, Խոդորկովսկին պատասխանեց․ «Վլադիմիր Պուտինն ունի 86 տոկոս ձայն, որից միայն 30-40-ն է ընտրում, որովհետև հավատում է, իսկ մնացածն ընտրում է, որովհետև այլընտրանք չի տեսնում։ Մեր նպատակն է ոչ թե անհատի, այլ համակարգի փոփոխությունը»։

Հարցին՝ ՌԴ-ում ո՞րն է կառավարման լավագույն համակարգը՝ նախագահակա՞ն, թե՞ խորհրդարանական, Խոդորկովսկին ասաց․ «ՌԴ-ն շատ մեծ երկիր է՝ տարբեր ազգություններով բնակեցված, ուստի բոլոր յուրահատկությունները պետք է հաշվի առնել, բայց ես կարծում եմ՝ ներդաշնակ համակարգը խորհրդարանականն է՝ ՌԴ-ում գործող ավտորիտար համակարգից անցում դեմոկրատականի։ Իմ կարծիքով՝ այժմ երկիրն արդյունավետ չի կառավարվում․ մարդիկ պետք է հավատան, որ եթե ուզենան՝ փոփոխության կարող են հասնել, մենք այդ փոփոխությունը տեսնում ենք խաղաղ եղանակով, ոչ թե բռնությամբ»։

Ճշտող հարցին՝ ի՞նչ ազդեցություն կարող են ունենալ փողոցային ցույցերը, Խոդորկովսկին նկատեց, որ ցույցերը շատ կարևոր են, սակայն բոլորի համար էլ պարզ է, որ անգամ հազարավոր մարդկանց փողոց դուրս գալու դեպքում ոչինչ չի փոխվի․«Սակայն իշխանությունները կհասկանան, որ հանրությունը դժգոհ է, այլընտրանքային կարծիքների առկայությունը շատ կարևոր է»։

Խոդորկովսկին շեշտեց, որ Պուտինը պրագմատիկ մարդ է, ուստի օգտագործելու է առաջիկա վեց տարիները՝ իշխանությունն իր հաջորդողին փոխանցելու համար։