Հայաստանից դուրս բերված գումարները հնարավո՞ր է վերադարձնել. դատախազ Կարեն Ամիրյանի պարզաբանումը. ՏԵՍԱՆՅՈՒԹ

«Հսկող դատախազը ես չեմ, չեմ կարող գնահատական տալ կոնկրետ գործի մասին հարցադրումներին, բայց եթե ընդհանրական ասեմ, բոլոր գործերի դեպքում այս պահի դրությամբ դատախազությունն իրականացնում է օրենքով վերապահված լիազորություններ՝ այդ թվում կալանքի հետ կապված հարցերն իրացնելու համար»,-լրագրողների հետ ճեպազրույցում նշեց ՀՀ դատախազության կազմակերպական-վերահսկողական և իրավական ապահովման վարչության պետի տեղակալ Կարեն Ամիրյանը՝ անդրադառնալով հարցադրմանն այն մասին, որ Գորիսի նախկին համայնքապետ Առուշ Առուշանյանը շարունակում է մնալ կալանավորված, թեև պաշտպանների խոսքով՝ հիմքեր չկան։

«Դատախազության դիրքորոշումը հստակ է։ Որևէ մեկի համամիտ չլինելը չի նշանակում, թե դատախազությունն իրավաչափ չի գործում»,- կարծիք հայտնեց Ամիրյանը։

Հայաստանից դուրս բերված գումարները հնարավո՞ր է վերադարձնել. Կարեն Ամիրյանն այս հարցի վերաբերյալ ներկայացրեց իր պարզաբանումը:

«Դատախազությունը որոշակի տվյալներ է հրապարակել, թե ապօրինի ծագում ունեցող  գույքի բռնագանձման շրջանակներում քանի ուսումնասիրություն է իրականացվել, մի քանի գործերով արդեն հայցի ապահովման միջոցներ են կիրառվել, շուտով, կարծում եմ, դատական գործընթացներ կսկսվեն:

Ակտիվների՝ Հայաստանից դուրս գտնվելու խնդիրն իսկապես առկա է: Ցանկացած հանցանքի հետ կապված գործընթացը, որը կապված է Հայաստանից դուրս գտնվող ակտիվների հետ, ավելի բարդ գործընթաց է: Պետք է փորձենք միջազգային համագործակցության գործիքակազմը լիարժեքորեն կիրառել, որ հնարավոր լինի ապահովել նախ՝ պարզել Հայաստանից դուրս բերված ակտիվների ծավալը, երկրորդ՝ դրանց վրա արգելանք դնել, երրորդ՝ դատական վարույթի շրջանակներում վերադարձնել»,- նշեց Ամիրյանը:

Մանրամասները՝ տեսանյութում: