16.12.2025 | 13:20
Թրամփը դատի է տվել BBC-ին` պահանջելով 5 մլրդ դոլար
Թուրքիան այս ամիս իր արտարժույթի պահուստներից, հնարավոր է, ավելի քան 13․5 մլրդ դոլար է ծախսել
Քաղաքականություն
24.12.2021 | 23:30
Թուրքիայի Կենտրոնական բանկը, հնարավոր է, ավելի քան 13․5 մլրդ դոլար է ծախսել իր արտարժույթի պահուստներից՝ օգնելու պաշտպանել լիրան դեկտեմբերի ռեկորդային արժեզրկումից, գրում է «Ահվալ» գործակալությունը։
Կենտրոնական բանկի նախկին պաշտոնյա Ուղուր Գյուրսեսն ասել է, որ դեկտեմբերի 20-ին և 21-ին վաճառքը կազմել է 7 մլրդ դոլար։ Կենտրոնական բանկը պահուստները վաճառել է «հետնամուտքով՝ պետական բանկերի մասնակցությամբ»։
Ընդդիմադիր Ժողովրդահանրապետական կուսակցության կառավարման կազմի անդամ, ֆինանսների նախկին փոխնախարար Ֆաիկ Օզթրակը, որն օգնել է Թուրքիային 2000-ականներին հաջողությամբ անցնել ԱՄՀ-ի ծրագիրը, նշել է, որ արտարժույթի վաճառքները դեկտեմբերի 1-ից մինչև դեկտեմբերի 17-ը կազմել են 6,5 միլիարդ դոլար, այդ թվում՝ 6 միլիարդ դոլար արժութային շուկաներում ուղղակի միջամտությունները։
Թուրքիայի Կենտրոնական բանկն արտարժույթի շուկայում առնվազն 4 անգամ ինտերվենցիա է իրականացրել՝ նախքան երկուշաբթի լիրայի պատմական նվազագույնին հասնելը՝ գերազանցելով 18 դոլարը։ Այդ օրն ավելի ուշ նախագահ Ռեջեփ Թայիփ Էրդողանը հայտարարել էր կառավարության ծրագիրը՝ փոխհատուցելու ավանդատուների արժեզրկման վնասները։ Դրանից հետո լիրան սկսեց կայունանալ։
Ըստ Financial Times-ի՝ Թուրքիայի զուտ արտաքին ակտիվներն էլ այս շաբաթվա առաջին երկու օրերին նվազել են 5,9 միլիարդ դոլարով` մինչև մինուս 5,1 միլիարդ դոլար։ Լրատվամիջոցը գրում է, որ լոնդոնյան վերլուծաբանը, որը խնդրել է չհրապարակել իր անունը, նշել է, որ այդ նույն երկու օրվա ընթացքում հաշվարկել է 6,9 միլիարդ դոլարի միջամտություն:
Էմմա Չոբանյան
