19.11.2024 | 21:34
Լավրովն ԱՄՆ-ին մեղադրել է Բրյանսկի շրջանում ATACMS-ով հարվածներին մասնակցելու մեջ
Ուսուցիչների աշխատավարձը կարող է հասնել 400.000 դրամի․ պայմանը ատեստավորում անցնելն է․ ՏԵՍԱՆՅՈւԹ
Հասարակություն
23.12.2021 | 22:06
Հայաստանում ուսուցչի աշխատանքը գրավիչ դարձնելու համար միայն հավելավճարի քաղաքականությունը բավարար չէ, կարևոր է աշխատավարձային քաղաքականություն մշակել։ Տարեվերջյան ամփոփիչ ասուլիսի ժամանակ նման կարծիք հնչեցրեց ԿԳՄՍ փոխնախարար Ժաննա Անդրեասյանը։
Բարձր աշխատավարձ կստանան միայն նրանք, ովքեր անցել են կամավոր ատեստավորում։ Այս տարի ատեստավորման հայտ էր ներկայացրել 1372 ուսուցիչ, նրանցից գործընթացին մասնակցել է 996-ը, որոնցից 47 տոկոսն է հավաքել ատեստավորման համար անհրաժեշտ միավորները։ Նրանք 30-50 տոկոս հավելավճար են ստացել կամ կստանան։
2022 թվականի կամավոր ատեստավորման գործընթացում նախարարությունը մի քանի փոփոխություն կիրականացնի։ Նախ՝ կփոփոխվի առաջադրանքների ծավալ/տրվող ժամանակ հարաբերակցությունը, որպեսզի ուսուցիչներն ավելի երկար մտածելու ժամանակ ունենան։ 2021 թվականի ատեստավորումն իրականացվել է միայն Երևանում, իսկ 2022-ին այն կանցկացվի նաև մարզերում։ Բացի այդ՝ թեստերի հետ կապված մասնագիտական խմբերը ստացել են մի շարք հարցեր, որոնք հաջորդ տարի կվերանայվեն։
Կամավոր ատեստավորում անցած ուսուցիչների դրույքաչափի էական փոփոխություն կլինի։ Այժմ նվազագույն դրույքաչափը 108,800 դրամ է. նախարարությունն ուզում է այն հասցնել մինչև 200,000 դրամի, որի նկատմամբ նոր կկիրառվի հավելավճարը, այսինքն՝ առավելագույն աշխատավարձը պատասխանատուները մտադիր են հասցնել մինչև 400․000 դրամի։
Կրթության փորձագետ Սերոբ Խաչատրյանն այս մոտեցումը խտրական է համարում․ ըստ նրա՝ ատեստավորվածներին 30-50 տոկոս հավելավճար տալը լրիվ բավարար էր․ «Կողմ եմ, որ ուսուցիչները բարձր աշխատավարձ ստանան, բայց պետք չէ տարբերություններն այդքան մեծ անել։ Պետք չէ կրթության մեջ որևէ ցուցիչ ֆետիշացնել»։
Ուսուցիչների 20 տոկոսի աշխատավարձի էական տարբերությունը խնդիրների կարող է հանգեցնել․ փորձագետը կարծում է՝ ուսուցիչների մյուս մասը, այսպես ասած, կչարանա։ Ըստ Սերոբ Խաչատրյանի՝ մոտիվացնել պետք է բոլոր ուսուցիչներին։
2022 թվականին աշակերտների թվով ֆինանսավորումից կանցնենք դասարանների թվով ֆինանսավորմանը, ինչը, ըստ Անդրեասյանի, թույլ կտա պակասեցնել նույն դասարանում սովորողների թիվը և ավելի արդյունավետ դարձնել ուսուցումը։ Այս մոտեցմանը համամիտ է նաև Սերոբ Խաչատրյանը։
2020 թվականի մայիսին ընդունված Նախադպրոցական կրթության մասին նոր օրենքի համաձայն՝ մինչև 2023 թվականի ավարտը ոլորտը պետք է անցում կատարի դեպի համընդհանուր ներառում։ Ֆինանսավորումը կիրականացվի 2022 թվականի սեպտեմբերի 1-ից: Այսուհետ, լիցենզավորման ենթակա են նաև նախադպրոցական ծառայությունները, ինչը, ըստ ԿԳՄՍ փոխնախարարի, թույլ կտա կարգավորել ոլորտում գործող և այս պահին որևէ կառույցի կողմից չվերահսկվող, նախադպրոցական տարիքի երեխաներին ուղղված տարբեր ծառայությունները։ Միայն 2021-ին ավելի քան 90 նախադպրոցական հաստատություն է լիցենզավորվել։
Մանրամասները՝ տեսանյութում։
Արփի Հակոբյան
