ԵԽ մարդու իրավունքների հանձնակատարն Ալիևին կոչ է արել ազատ արձակել իրավապաշտպաններին, լրագրողներին և քաղակտիվիստներին

Եվրոպայի խորհրդի մարդու իրավունքների հանձնակատար Մայքլ Օ՛Ֆլայերտին Ադրբեջանի նախագահ Իլհամ Ալիևին կոչ է արել բանտից ազատել իրավապաշտպաններին, լրագրողներին և ակտիվիստներին։ Նա Ադրբեջանի նախագահին ուղղված նամակ է հրապարակել, որում կոչ է արել երկրի իշխանություններին՝ անհապաղ ազատ արձակել բոլոր իրավապաշտպաններին, լրագրողներին և քաղաքացիական հասարակության ակտիվիստներին, որոնք ազատազրկված են իրենց օրինական գործունեության, այլակարծություն կամ քննադատական ​​կարծիք արտահայտելու համար, վերացնել նրանց դեմ քրեական մեղադրանքները, ինչպես նաև հարակից սահմանափակումները, ներառյալ՝ արտերկիր մեկնելու արգելքը:

Հանձնակատարը նաև հորդորել է Ադրբեջանի իշխանություններին արդյունավետ հետաքննություն անցկացնել մի քանի իրավապաշտպանների, լրագրողների և ակտիվիստների նկատմամբ ոստիկանական կալանքի տակ գտնվելու ժամանակ վատ վերաբերմունքի մասին մեղադրանքների վերաբերյալ, ինչպես նաև ապահովել փաստաբանի հասանելիության և համապատասխան բժշկական օգնության իրավունքները:

Ըստ հանձնակատարի՝ Ադրբեջանի իշխանությունները պետք է ապահովեն, որ միավորումների, խաղաղ հավաքների և ազատ արտահայտվելու, իրավապաշտպանների, լրագրողների և քաղաքացիական հասարակության ակտիվիստների իրավիճակի հետ կապված բոլոր օրենքները համապատասխանեն Եվրոպայի խորհրդի մարդու իրավունքների համապատասխան չափանիշներին, այդ թվում՝ ամբողջությամբ կատարելով Մարդու իրավունքների եվրոպական դատարանի (ՄԻԵԴ) համապատասխան վճիռները։

Թարգմանությունը՝ Էմմա Չոբանյանի