14.10.2026 | 20:10
Ինչ են խոսել անկլավների մասին․ Փաշինյանը բացահայտում է Ալիևի հետ Թուրքմենստանում շփման թեման. ՏԵՍԱՆՅՈՒԹ
Քննիչն ու այլ պաշտոնատար անձինք բռնություն են գործադրել դատապարտյալի հանդեպ
11.04.2018 | 15:00
ՀՀ հատուկ քննչական ծառայությունում քրեական գործեր են հարուցվել պետական հատուկ ծառայություն իրականացնող պաշտոնատար անձանց կողմից ծանր հանցագործության վերաբերյալ քրեական գործով ապացույց կեղծելու և բռնությամբ զուգորդված պաշտոնեական լիազորություններն անցնելու դեպքերի առթիվ, որոնք նախատեսված են ՀՀ քրեական օրենսգրքի 349-րդ հոդվածի 3-րդ մասի 1-ին կետով և 309-րդ հոդվածի 2-րդ մասով:
Այսպես, ՀՀ քննչական կոմիտեի Էրեբունի և Նուբարաշեն վարչական շրջանների քննչական բաժնում ծանր հանցագործության դեպքի առթիվ հարուցված քրեական գործով վկա Ռ. Մ.-ն հաղորդում է տվել, որ հիշյալ բաժնի քննիչի կողմից կեղծվել է նախաքննության ընթացքում իր կողմից տրված ցուցմունքը: Մասնավորապես, Ռ. Մ.-ն հայտնել է, որ քննիչը, արձանագրելով իր ցուցմունքը և օգտվելով իր կողմից գրավոր հայերենին չտիրապետելու հանգամանքից, դրանում մտցրել է կեղծ տվյալներ, թե իբր ծանր հանցագործության մեջ մեղադրվող Ա. Կ.-ն իրեն պատմել է նրա կատարած հանցագործության իրական հանգամանքները: Ըստ Ռ. Մ.-ի` քննիչն այդ կերպ իրենից մեղադրող ցուցմունք է ստացել ընդդեմ Ա. Կ.-ի, մինչդեռ իրականում ինքը քննիչին նման տեղեկություն չի հայտնել:
Կատարվում է նախաքննություն:
Մյուս քրեական գործը Հատուկ քննչական ծառայությունում հարուցվել է մի շարք ծանր հանցագործությունների, այդ թվում` ապօրինի զենք պահելու, անձանց առևանգման և սպանության համար ցմահ ազատազրկման դատապարտված, ՀՀ ԱՆ «Նուբարաշեն» քրեակատարողական հիմնարկում պատիժ կրող Հ. Խ.-ի` տարբեր պետական ատյաններ ուղղված գրությունների հիման վրա: Դրանցում դատապարտյալը հայտնել է քրեական գործի նախաքննության և դատաքննության ընթացքում մի շարք պաշտոնատար անձանց կողմից իր նկատմամբ ապօրինի գործողություններ կատարելու մասին:
Մասնավորապես, ըստ դատապարտյալի` իր վերաբերյալ քրեական գործի նախաքննության ընթացքում գործով վարույթն իրականացրած քննիչն ու այլ պաշտոնատար անձինք բռնություն են գործադրել իր նկատմամբ՝ ապացույցներ կորզելու նպատակով: Իսկ հետագայում` «Նուբարաշեն» քրեակատարողական հիմնարկում պատիժը կրելու ընթացքում, ենթարկվել է բռնությունների` Վերաքննիչ դատարան և այլ ատյաններ ուղղված բողոքներից հրաժարվելու համար:
Կատարվում է նախաքննություն:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքովսահմանված կարգով` դատարանի` օրինական ուժի մեջ մտած դատավճռով:
