16.12.2025 | 13:33
Արման Ծառուկյանի մրցակիցը փոխվել է
Իշխանական կուլիսներում այս օրերին հաշվարկներ են անում, թե ինչքան մարդ դուրս կգա փողոց. «Հրապարակ»
06.04.2018 | 09:17
«Հրապարակ» թերթը գրում է.
Անկախ թվացյալ հանդարտությանն ու ինքնավստահությանը, իրականում իշխանությունը բավականին անհանգիստ է։ Եվ այդ անհանգստությունը ոչ միայն Սերժ Սարգսյանի վարչապետության դեմ պայքարող ուժերի՝ Նիկոլ Փաշինյանի ու սակավաթիվ «արմատականների» պայքարով է բացատրվում, այլև շատ ուրիշ գործոններով։
Իշխանական կուլիսներում այս օրերին հաշվարկներ են անում, թե ինչքան մարդ դուրս կգա փողոց, 14-17-ն ընկած շրջանում Ազատության հրապարակում ինչպիսի բազմություն կհավաքվի։ Թերևս այս անհանգստությունն է պատճառը, որ ամեն ինչ անում են այս փուլը խաղաղ հաղթահարելու համար։ Փորձում են պոտենցիալ բողոքողներից ում կարող են հետ պահել փողոց դուրս գալուց։
Այս օրերին մեզ լուրեր են հասնում, որ գործի են դնում տարբեր լծակներ՝ վախեցնելու, գայթակղելու, փողոցային ակցիաներից հետ պահելու համար։ Բացի այդ, բոլոր այն անձանց, ում ետևում կարող է կանգնած լինել թեկուզ փոքրաթիվ համախոհների խումբ, զգուշանում են «նեղացնելուց»։
Եվ դա է պատճառը, որ որոշվել է ոչ մի կարևոր պոստում կադրային փոփոխություն չանել՝ կառավարությունում և իշխանության վերին էշելոններում բոլորը պահպանելու են իրենց դիրքերը։
Նրանց, ում հաստիքը լուծարվում է կամ կառուցվածքային փոփոխություն պետք է արվի, համարժեք առաջարկներ են արվում։ Իսկ նրանց, ում ինչ-ինչ խոստումներ էին տրվել և նրանք հույսով սպասում էին ապրիլյան փոփոխություններին, խոստանում են մինչև տարեվերջ բավարարել։
Խնդիրը մեկն է՝ ոչ մի դժգոհ մարդ չպետք է լինի, իշխանության վերարտադրությանը ոչինչ չպետք է խանգարի և ոչինչ չպետք է մթագնի «նոր» փուլի սկիզբը»:
Առավել մանրամասն՝ թերթի այսօրվա համարում:
