01.11.2024 | 14:29
Լավրովն Ուկրաինայում պատերազմի մեկնարկից ի վեր առաջին անգամ կայցելի ԵՄ անդամ երկիր
Գյումրիում բացվեց աշխատանքի տոնավաճառ․127 գործատու 650-ից ավելի աշխատատեղ է առաջարկում․ ՏԵՍԱՆՅՈՒԹ
Հասարակություն
19.11.2021 | 15:54
Եվրամիության ֆինանսավորմամբ Գյումրու երիտասարդական պալատում այսօր բացվեց աշխատանքի տոնավաճառ։
Կազմակերպիչները «Մարդը կարիքի մեջ» հասարակական կազմակերպությունն ու «Ադամյան և ընկերներ» աշխատանքի տեղավորման կադրային կենտրոնն էին։
«Ադամյան և ընկերներ» կադրային կենտրոնի ղեկավար Ամալյա Ադամյանն իր ելույթում նշեց, որ այս տոնավաճառն աննախադեպ է նրանով, որ մեկ հարկի տակ հավաքել են ինչպես գործատուների, այնպես էլ պետական ուսումնական հաստատությունների ուսանողների, որպեսզի նրանք հանդիպեն, կարիքները գնահատեն և սկսեն համագործակցել։
Այս տոնավաճառը օգնելու է նաև աշակերտներին մասնագիտական կողմնորոշման հարցում։
Ըստ բանախոսի՝ չնայած տարածքը փոքր է և 25 գործատուներ են տեղավորված, սակայն տոնավաճառն իրականում ներկայացնում է 127 գործատուների, որոնք 650-ից ավելի թափուր աշխատատեղեր են առաջարկում, ունեն նաև 119 սպասվող աշխատատեղեր։
«Մարդը կարիքի մեջ» հայաստանյան կազմակերպության ղեկավար Վարդուհի Դադունցն էլ իր ելույթում նշեց, որ տոնավաճառն իրականացվում է Եվրամիության կողմից ֆինանսավորվող «Անցում կրթությունից աշխատաշուկա» ծրագրի շրջանակում, որի անվանումն արդեն իսկ հուշում է,որ նպատակը կրթությունից սահուն կերպով աշխատաշուկա մտնելն է։
«Այս ծրագրի շրջանակում Շիրակի մարզի տեքստիլ և ագրո ոլորտներում իրականացրել ենք աշխատաշուկայի պահանջների վերլուծություն, որի արդյունքում 8 մասնագիտությունների համար մշակել ենք ուսումնական ծրագրեր՝ երկարաժամկետ և կարճաժամկետ, և մոտ 13 աշակերտներ կարողացել են այդ մասնագիտություններում մասնագիտանալ մեր գործընկեր ուսումնական հաստատություններում»,- ասաց Վարդուհի Դադունցը։
Ըստ նրա՝ դասընթացներից անմիջապես հետո 10-ը գտել են աշխատանք այն գործատուների մոտ, որոնց գլխավորած կառույցներում անցել են պրակտիկ դասեր, ևս 8-ն այսօր տոնավաճառի ընթացքում կկնքեն աշխատանքային պայմանագրեր։
Ըստ պաշտոնական տեղեկատվության՝ Շիրակի մարզում 2021 թվականի օգոստոսի դրությամբ, գրանցված աշխատանք փնտրողների թիվը կազմում է 17 489, որը նախորդ նույն ժամանակահատվածի հետ համեմատ ավելի է 3,6 տոկոսով։
Շիրակի մարզում շարունակում է բարձր մնալ գործազուրկ կանանց թիվը, որը կազմում է գործազուրկների ընդհանուր թվի մոտ 70 տոկոսը։
Արմիկ Մովսիսյան
