16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Հայաստանը դիմում է Ռուսաստանին՝ ՀՀ տարածքային ամբողջականությունը պաշտպանելու կոչով․ ԱԽ քարտուղար․ ՏԵՍԱՆՅՈՒԹ
Քաղաքականություն
16.11.2021 | 15:55
Քանի որ հարձակումը եղել է Հայաստանի սուվերեն տարածքի վրա, ապա մենք դիմում ենք Ռուսաստանի Դաշնությանը՝ ՀՀ-ի և ՌԴ-ի միջև գոյություն ունեցող 1997 թվականի պայմանագրի շրջանակում Հայաստանի տարածքային ամբողջականությունը պաշտպանելու կոչով և համաձայնագրի շրջանակում փոխադարձ պարտականությունները իրագործելու տրամաբանության շրջանակում։ Առաջին ալիքի «Լուրեր»-ին տված հարցազրույցում այս մասին հայտնեց ՀՀ Անվտանգության խորհրդի քարտուղար Արմեն Գրիգորյանը։
Հարցին՝ սա ընդամենը բանավոր դիմո՞ւմ է, թե՞ արդեն համապատասխան ընթացակարգ է ընթանում, Արմեն Գրիգորյանը պատասխանեց․ «Սա բանավոր դիմում է, որը նաև գրավոր ընթացակարգ է ունենալու, բայց մենք ուզում ենք հանրությանը և մեր գործընկերներին տեղեկացնել, որ այսպիսի գործընթաց ենք սկսում»։
ԱԽ քարտուղարի խոսքով՝ Հայաստանն ակնկալում է, որ ՌԴ-ն օգնություն կտրամադրի և «մենք հնարավորություն կունենանք Հայաստանի տարածքային ամբողջականությունը վերականգնելու»։
«Բազմաթիվ անգամ խոսվել է, որ ՀՀ-ի պետական սահմանը հանդիսանում է «կարմիր գիծ» Ռուսաստանի համար, և մայիսի 12-ից սկսած ադրբեջանցիները խախտել են այդ «կարմիր գիծը»։ Այս առումով մենք մեր դաշնակցին դիմում ենք, որպեսզի կարողանանք մեր դաշնակցային պարտավորությունների շրջանակում վերականգնենք ՀՀ տարածքային ամբողջականությունը»,- նշեց Արմեն Գրիգորյանը։
Իսկ հարցին՝ այդ օգնությունը ենթադրում է բանակցային գործընթացներում ներգրավվածությո՞ւն, թե՞ ԶՈՒ-ով օգնություն, Գրիգորյանը պատասխանեց․ «Եթե հնարավոր լինի այս իրավիճակը, ճգնաժամը լուծել բանակցային ճանապարհով, ապա լուծել բանակցային։ Եթե հնարավոր չլինի բանակցային ճանապարհով լուծել, ապա տրամադրել Հայաստանին բավական ռազմական օգնություն, որպեսզի Հայաստանը կարողանա ստեղծված իրավիճակը հանգուցալուծել»։
Մանրամասները՝ տեսանյութում։
