20.11.2024 | 09:31
ՀՀ տարածքում ավտոճանապարհներն անցանելի են
Թուրքիայի խորհրդարանը երկարաձգել է Ադրբեջանում թուրք զինվորականների գտնվելու մանդատը․ դեմ է քվեարկել քրդական կուսակցությունը
Քաղաքականություն
11.11.2021 | 13:07
Թուրքիայի Ազգային մեծ ժողովը հավանություն է տվել Ադրբեջանում թուրք զինվորականների գտնվելու մանդատի երկարաձգմանը, գրում է «Անադոլու» գործակալությունը։
Օրինագիծը Թուրքիայի նախագահ Ռեջեփ Թայիփ Էրդողանի ստորագրությամբ հաստատվել է խորհրդարանի լիագումար նիստում։ Այսպիսով, թուրք զինվորականների ծառայությունն Ադրբեջանում 2021 թվականի նոյեմբերի 17-ից երկարաձգվում է ևս մեկ տարով։
Օրինագծին աջակցել են իշխող «Արդարություն և զարգացում», ընդդիմադիր Ժողովրդահանրապետական, «Լավ» (IYI) և Ազգայնական շարժում կուսակցությունները, իսկ քրդական Ժողովուրդների դեմոկրատական կուսակցությունը դեմ է քվեարկել։
«Թուրքիան, որը վճռական կերպով աջակցել է Ադրբեջանին գործընթացի հենց սկզբից, որ նա կարողանա պաշտպանել իր բոլոր իրավունքները, այդ թվում՝ տարածքային ամբողջականությունը՝ հիմնված միջազգային իրավունքի ու օրինական ինքնիշխան իրավունքների վրա, կարևոր նախաձեռնություններ է ձեռնարկում տարածաշրջանում խաղաղության ու կայունության պահպանման և ամրապնդման, ինչպես նաև դրան նպաստող տնտեսական ենթակառուցվածքների կառուցման ու վերականգնման համար»,- ասվում է փաստաթղթում։
Նշվում է նաև, որ Արցախի գրավյալ Ակնայում ռուս-թուրքական համատեղ մոնիթորինգային կենտրոնը հաջողությամբ շարունակում է իր գործունեությունը։
Հիշեցնենք՝ Թուրքիայի նախագահ Ռեջեփ Թայիփ Էրդողանի՝ Ադրբեջան թուրք զինվորականների ուղարկելու առաջարկն ընդունվել էր 2020 թվականի նոյեմբերի 17-ի խորհրդարանի լրագումար նիստում։ Խորհրդարանը թույլ էր տվել մեկ տարի ժամկետով զինվորականների ուղարկել Ադրբեջան՝ Թուրքիայի և Ադրբեջանի միջև Ռազմավարական գործընկերության և փոխօգնության համաձայնագրի դրույթներից բխող պարտավորությունները կատարելու համար՝ «հրադադարի ռեժիմի հաստատման խախտումների կանխման նպատակով, տարածաշրջանում խաղաղության և կայունության ապահովման ու Ռուսաստանի հետ հրադադարի վերահսկման համատեղ կենտրոնի առաքելության իրականացման համար»։
Էմմա Չոբանյան
