Քաղհասարակության նկատմամբ բացահայտ ճնշում է․ փաստաբանը՝ Սեդա Գրիգորյանի տան խուզարկության մասին․ ՏԵՍԱՆՅՈՒԹ

«Ֆիզգորոդոկ» անունով հայտնի բնակելի թաղամասում (Ալիխանյան 6/1), որը Երևանի կանաչ թաղամասերից է, բնակելի 12 հարկանի շենքի կառուցապատման նպատակով շինարարություն է նախատեսվում, ինչին բնակիչները դեմ են, ունեն մտահոգություններ և բազմիցս բողոքի ակցիաներ են իրականացրել:

Այսօր հրավիրված հանդիպման ժամանակ «Ֆիզգորոդոկի» բնակիչ, քաղաքացիական ակտիվիստ Սեդա Գրիգորյանը նշեց, որ ինքը հայտնվել է իրավապահ մարմինների ճնշումների թիրախում:

Նշենք, որ Ֆիզգորոդոկի շինարարության ժամանակավոր մետաղյա ցանկապատի վրա կարմիր ներկով գրության համար քրեական գործ է հարուցվել՝ որպես գույքային վնաս 100 հազար դրամի չափով:

Խուզարկություն է իրականացվել  «Ֆիզգորոդոկի» բնակիչ Սեդա Գրիգորյանի տանը, փնտրել են ներկի տուփը, սակայն չի հայտնաբերվել:

«Մենք չենք ընդունում Սեդա Գրիգորյանի որպես վկա (հնարավոր կասկածյալ) կարգավիճակը»,- այս մասին նշեց Սեդա Գրիգորյանի շահերի ներկայացուցիչ, փաստաբան Գևորգ Գյոզալյանը:

Փաստաբանը հավելեց, որ կարմիր ներկով թիթեղների վրա գրված է «Սա կանաչապատ տարածք է», այդ թիթեղներին վնաս չի հասցվել, կարելի է դա ջնջել, ինչի համար 30 հազար դրամը գերազանցող ծախսի անհրաժեշտություն չկա: Իսկ քրեական գործ կարելի է հարուցել, եթե 30 հազար դրամը գերազանցող վնաս է պատճառվել:

«Տպավորություն կա, որ սա քաղհասարակության նկատմամբ բացահայտ ճնշում է, որպեսզի նրանք խաղաղ ակցիաներ չիրականացնեն»,- ընդգծեց փաստաբանը:

Մանրամասները՝ տեսանյութում: