12.02.2026 | 09:42
Հրդեհ անվադողերի վերանորոգման կետում
Էրդողանը հայտարարել է, որ Թուրքիան շարունակելու է աջակցել Ադրբեջանին «Զանգեզուրի միջանցքի» հարցում
Քաղաքականություն
09.11.2021 | 12:55
Թուրքիայի նախագահ Ռեջեփ Թայիփ Էրդողանը կառավարության նիստից հետո հանդես է եկել հեռուստաուղերձով, որում անդրադարձել է նաև Արցախյան 44-օրյա պատերազմին, գրում է «Անադոլու» գործակալությունը։
Նա, մասնավորապես, շնորհավորել է Ադրբեջանին, այսպես կոչված, «հաղթանակի կապակցությամբ» ու նշել, որ, իբր, «30 տարի շարունակ Ղարաբաղի ու Ադրբեջանի այլ տարածքների օկուպացիան» դարձել է տարածաշրջանում պատերազմի պատճառ։ Էրդողանը պատերազմի մեջ մեղադրել է «նրանց, ովքեր տարիներ շարունակ լռություն են պահպանել և գլխավոր պատասխանատու են ողբերգության ու արյունահեղության»։
Էրդողանը նշել է, որ պատերազմում Թուրքիան վճռական աջակցություն է ցուցաբերել Ադրբեջանին։ Բացի այդ, նա ասել է, որ Անկարան շարունակելու է աջակցել Բաքվին բոլոր հարթակներում։
«Ֆիզուլիի օդանավակայանի բացմամբ մենք ցույց տվեցինք, որ մեր ադրբեջանցի եղբայրների հետ ենք վերականգնողական ու շինարարական աշխատանքներում։ Հենց այդպես էլ մենք աջակցում ենք մեր եղբայրներին ականազերծման աշխատանքներում»,- ասել է Թուրքիայի նախագահը՝ կրկին հիշելով, այսպես կոչված, «Զանգեզուրի միջանցքի» մասին։
«Մենք շարունակելու ենք աջակցել մեր ադրբեջանցի եղբայրներին յուրաքանչյուր հաթակում՝ ստանալու համաձայնագրից բխող իրենց իրավունքները, հատկապես՝ «Զանգեզուրի միջանցքի» հարցում»,- հավելել է Թուրքիայի նախագահը։
Նա նաև հայտարարել է, որ Կովկասի համար նոր դարաշրջան է բացվել և հնարավորություն է տալիս Հայաստանին դուրս գալ փակուղուց։ Ըստ Էրդողանի՝ «նոր գլոբալ համակարգում Կովկասի նշանակությունն աճելու է, և Թուրքիան լի է վճռականությամբ՝ իր ներդրումն ունենալ նրա պայծառ ապագայի գործում»։
Էմմա Չոբանյան
