Հասարակություն
03.11.2021 | 17:08Հայաստանի մարդու իրավունքների պաշտպան Արման Թաթոյանը ՀՀ ԱԺ մարդու իրավունքների պաշտպանության և հանրային հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում 2022 թվականի բյուջեի քննարկման ժամանակ անդրադարձավ նաև զինվորականների խնդիրներին: Նա նշեց, որ Զինված ուժերում մարդու իրավունքների պաշտպանության վերաբերյալ առաջարկներ են ներկայացվել ԱԺ հանձնաժողովներին:
Թաթոյանի խոսքով՝ զինծառայողների անվճար բուժօգնության հարցերը գլխավոր ոլորտներից է: «Ես խնդրում եմ ուժեղացնել խորհրդարանական վերահսկողությունը կամ այս ոլորտում հետևողականությունը՝ անվճար բուժօգնության հետ կապված, այն զինծառայողների նկատմամբ, որոնք զորակոչից ազատվել կամ զորացրվել են, բայց քանի որ ունեցել են հիվանդություն, չեն վիրահատվել ու խնդիրներ են ունենում», – ասաց ՄԻՊ-ը:
Թաթոյանը շեշտեց, որ պետք է ԱԺ-ն նպաստի, որ ներդրվի մեխանիզմ, և հնարավոր լինի նախապես զորակոչիկին հետազոտել, առողջական վիճակի հարցերը պարզել, հետո նոր զորակոչել բանակ:
Միաժամանակ ՄԻՊ-ը նկատեց, որ վերջին տարիներին զգալիորեն բարելավել է զորակոչի կազմակերպման հետ կապված հարցերը: «Պաշտպանության նախարարության հետ կարևորում ենք ինստիտուցիոնալ համագործակցությունը» – նշեց նա:
Արման Թաթոյանի կարծիքով՝ առաջնային խնդիրներից է մնում նաև զինվորականների բնակարանային հարցը:
«Ստացվել է այնպես, որ 20 ու ավելի տարվա զինվորական ծառայության կենսագրություն ունեցող սպան ոչ միայն չունի սեփական բնակարան, այլև բնակվում է վարձակալությամբ ու բնակվարձի անհամաչափ փոխհատուցման արդյունքում նույնիսկ ստիպված է լինում վճարել իր գրպանից՝ աշխատավարձի հաշվին», – բարձրաձայնեց ՄԻՊ-ը:
Մանրամասները՝ տեսանյութում:
