«Հայաստանի Հանրապետության վարչապետի գավաթ» սիրողական կրոսավազքին մասնակցելու հայտ է ներկայացրել ավելի քան 1500 անձ։ Այսօր հրավիրված ասուլիսում հայտնեց ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը։
Մրցույթն անցկացվելու է հոկտեմբերի 30-ին Երևան-Էջմիածին ճանապարհին։ Գիլոյանի խոսքով` մասնակցելու է 3 տարիքային խումբ՝ 1-ին տարիքային խումբ՝ 15-17 տարեկան դպրոցականներ, որոնք կվազեն 3 կմ, 2-րդ տարիքային խումբ՝ 18-35 տարեկան կանայք, 18-40 տարեկան տղամարդիկ, որոնք կվազեն 10 կմ, 3-րդ տարիքային խումբ՝ 36 և բարձր տարիքի կանայք, 41 և բարձր տարիքի տղամարդիկ, որոնք ևս կվազեն 10 կմ:
«Մենք այսօր Հայաստանում 10 կմ վազող պրոֆեսիոնալ մարզիկ չունենք, դրա համար էլ հայտարարել ենք, որ կմասնակցեն բոլոր ցանկացողները»,- նշեց Գիլոյանը:
Մրցանակային ընդհանուր ֆոնդը կազմում է 15 մլն դրամ։
Կարեն Գիլոյանի կարծիքով՝ «Վարչապետի գավաթ» կրոսավազքի մրցաշարը կարող է նոր մշակույթի հիմք դառնալ սպորտը մասսայականացնելու հարցում:
Մանրամասները՝ տեսանյութում:
