Հասարակություն
15.10.2021 | 18:17ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանն այսօր բացարկի միջնորդություն ներկայացրեց սահմանադրական կարգի ենթադրյալ տապալման գործի կարճման դեմ բերված վերաքննիչ բողոքները քննող դատավոր Նարինե Հովակիմյանին։
Պաշտպանն ընդգծեց, որ Հովակիմյանը չի կարող համարվել անկախ և անկողմնակալ դատավոր, իսկ նրա մասնակցությամբ դատավարությունը` արդար։
Մեղադրող դատախազ Գևորգ Բաղդասրայանն առարկեց ինքնաբացարկի միջնորդության դեմ «Դատավորը համարվում է պատշաճ, քանի դեռ հակառակը չի հիմնավորվել: Ենթադրությունների և կասկածների հիման վրա է բացարկի միջնորդություն ներկայացվել: Պետք է հիմնավորեն, որ Դուք պատշաճ դատավոր չեք»,- ընդգծեց դատախազը:
Նշենք, որ Հայկ Ալումյանն ընդգծել է. «2008 թվականի մարտի 1-ի իրադարձությունների ակտիվ մասնակիցներից մեկն է եղել ԲԴԽ նախագահի պաշտոնակատար Գագիկ Ջհանգիրյանը։ Եվ հենց այն ժամանակ, երբ գործը քննվում է վերաքննիչ դատարանում, նա միջնորդել է, որպեսզի նախագահող դատավոր Նարինե Հովակիմյանը պարգևատրվի շքանշանով։ Մի մարդ, որն ի սկզբանե՝ մարտի 1-ից սկսած, այս գործով ունի կտրուկ դիրքորոշում, որը հակասում է Ռոբերտ Քոչարյանի դիրքորոշմանը, Ձեզ ներկայացնում է պարգևատրման»:
«Դուք ինձ համար բացահայտում արեցիք այսօր։ Հայտարարում եմ, որ մինչ այս պահը տեղեկացված չեմ եղել, որ պարոն Ջհանգիրյանի կողմից եմ ներկայացվել այդ պատվավոր մրցանակին»,- արձագանքել է Հովակիմյանը։
Ալումյանը նաև շեշտել է, որ մինչ պարգևատրումը որևէ կասկած չի ունեցել դատավորի անկողմնակալության վերաբերյալ։
Պաշտպաններ Էրիկ Ալեքսանյանն ու Կարեն Մեժլումյանը միացել են միջնորդությանը։
Մանրամասները՝ տեսանյութում:
