Սա առաջին միջանցքն էր, որ տրվեց Ադրբեջանին. Աննա Գրիգորյանը՝ ՀՀ տարածքով Ադրբեջանի թռիչքի մասին. ՏԵՍԱՆՅՈՒԹ

Գորիս-Կապան ավտոճանապարհին մեր հայրենակիցները մոտ մեկ ժամ սպասում են մինչև ռուս սահմանապահը գալիս է և ուղեկցում այդ ճանապարհահատվածում: ԱԺ-ում լրագրողների հետ զրույցի ժամանակ նշեց «Հայաստան» խմբակցության պատգամավոր Աննա Գրիգորյանը:

«Այսինքն՝ մեր հայրենակիցները հատկապես եղանակային նման պայմաններում ստիպված են մեքենայի մեջ սպասել մինչև ռուս սահմանապահը կգա: Ադրբեջանցիներն ինտենսիվ և լայնածավալ շինարարական աշխատանքներ են իրականացնում: Նախորդ անգամ, երբ շինարարական աշխատանքներ իրականացրեցին, տեսանք, որ այնտեղ մաքսակետը հայտնվեց: Հիմա այս շինարարական աշխատանքները ի՞նչ նոր սպառնալիքներ ու մարտահրավերներ են իրենից ներկայացնում տեղյակ չենք»,- ասաց Աննա Գրիգորյանը:

Պատգամավորը նշեց, որ դա էր նպատակը, երբ հրավիրում էին համապատասխան գերատեսչության ղեկավարներին, որ գային ու պատասխաններ տային, սակայն իշխանական պատգամավորները խոչընդոտում են այդ հանդիպման կայացմանը:

«Ես կարող եմ ենթադրել, որ նրանք կա՛մ գաղտնի ինչ-որ պայմանավորվածություններ ունեն, որոնց մասին չեն ուզում բարձրաձայնել, կա՛մ էլ ուղղակի չեն տիրապետում»,-նշեց Աննա Գրիգորյանը:

Պատգամավորի դիտարկմամբ՝ մի շարք փաստեր խոսում են այն մասին, որ այս իշխանություններն արդեն բանավոր կերպով Գորիս-Կապան ճանապարհը հանձնել են Ադրբեջանին: «Հայաստան» խմբակցության պատգամավոր Աննա Գրիգորյանը:

«Երբ Վահե Ղալումյանն ասում է, որ դա ադրբեջանական տարածք է, որևէ իրավական փաստաթուղթ չի կարող ցույց տալ, որի հիման վրա նա կարող է նման բան ասել: Նա չի կարող և որպես պետական պաշտոնյա չպետք է նման բան անի: Մի շարք փաստեր խոսում են այն մասին, որ դե ֆակտո այդ ճանապարհը տրված է Ադրբեջանին»,- նշեց Աննա Գրիգորյանը:

Պատգամավորն ասաց, որ երբ իրանական բեռնատար մեքենաները մտնում են Հայաստան, նրանց փաստաթղթերում կնիք է դրվում: Հետո գալիս են ու մեր մաքսատան աշխատակիցներն այդ ադրբեջանական կնիքի վրա են կնիք դնում:

«Փաստորեն դե ֆակտո ճանաչում են, որ ադրբեջանցիները այդ ճանապարհի կոնկրետ հատվածում հստակ լիազորություն ունեն: Բայց որևէ իրավական փաստաթուղթ այս առումով չկա»,- ասաց պատգամավորը:

Անդրադառնալով այլընտրանքային ճանապարհներին՝ Աննա Գրիգորյանը նշեց, որ Բարձրավանի, Շուռնուխի և Որոտանի հատվածում նորմալ ճանապարհ չկա: Գրունտային ճանապարհն էլ անտառածածկ տարածքում է լինելու և հարմար չի լինելու:

«Անթույլատրելի է կարծել, որ Գորիս-Կապան ճանապարհը կարող ենք ընդհանրապես հանձնել Ադրբեջանին, և այդ երեք գյուղերի հայրենակիցները լուրջ խնդիրների առջև են կանգնելու»,- նշեց պատգամավորը:

Անդրադառնալով դիտակմանը, որ «Ադրբեջանական ավիաուղիները» այսօրվանից՝ հոկտեմբերի 6-ից սկսել է օգտագործել Հայաստանի օդային տարածքը Բաքու-Նախիջևան-Բաքու չվերթներն իրականացնելու համար՝ Աննա Գրիգորյանը նշեց. «Սա առաջին օդային միջանցքն էր, որ տրվեց Ադրբեջանին: Կարծում եմ այսօր Կառավարության անդամների հետ հարցուպատասխանի ժամանակ կհնչի այդ հարցը և կփորձեն հասկանալ, թե ինչ պայմանում է ստացվել, որ օդային միջանցք է տրամադրվում Ադրբեջանին: Այսինքն՝ Իրանը փակում է, իսկ Հայաստանը, որ բազմաթիվ խնդիրներ ունի Ադրբեջանի հետ, առանց դրանք լուծելու, տալիս է այդ օդային միջանցքը: Դա մեզ համար տրամաբանական չէ»:

Հարցին, թե ինչ հույսով է իրենց թիմը գնում իշխանափոխության օրակարգի հետևից, Աննա Գրիգորյանն ասաց, որ ունեն հստակ օրակարգ և իշխանափոխությունը պետք է անխուսափելի լինի:

«Փաստացի հիմք է պատրաստվում երկրի վերջնական կապիտուլյացիայի համար, ինչը մեզ համար անընդունելի է, և սրա դեմ պայքարելու ենք լինի դա խորհրդարանում, փողոցում, թե այլ հարթակում»,- նշեց Աննա Գրիգորյանը:

Մանրամասները՝ տեսանյութում: