Հասարակություն
01.10.2021 | 14:29Չգիտեմ՝ վեթինգի կարիք ունենք, թե ոչ, dատական համակարգում նորմալ աշխատում ենք` յուրաքանչյուրս իր տեղում, իր դիրքում է։ Լրագրողների հետ զրույցում այս մասին ասաց դատավոր Արշակ Վարդանյանը։
Դիտարկմանը, որ խոսում են կարգապահական վարույթներն ավելացնելու մասին, և հարցին, թե դա սպառնալի՞ք է դատավորների համար, Արշակ Վարդանյանը նկատեց՝ եթե ավելանալու են, թող ավելանան։
«Արդեն միանշանակ է, եվրոպական համապատասխան կառույցներն էլ են արձանագրել, որ ՀՀ արդարադատության նախարարը չպետք է ունենա այդ գործիքակազմը՝ դատավորների նկատմամբ վարույթ հարուցելու։ Հատկապես խոսքը վերաբերում է նյութական դատավարական իրավունքի խախտման դեպքերին»,-նշեց դատավորը։
Անդրադառնալով այն խոսակցություններին, որ նախկինում դատավորները պատվերներ են կատարել՝ Արշակ Վարդանյանն ասաց, որ փորձում է նման արտահայտություններին ուշադրություն չդարձնել։
«Ինչպես աշխատել եմ առաջին օրը, նույն կերպ էլ աշխատում եմ ներկայումս։ Կլինի որևէ պաշտոնյա, թե հանրային ծառայող կամ քաղաքացի, չի կարող դատավորի վրա ներազդել, եթե դատավորը նման հակումներ չունի։ Իմ նկատմամբ ճնշումներ չկան և չեն կարող լինել»,- նշեց Վարդանյանը։
