Քաղաքականություն
22.09.2021 | 22:50
Չինական Ուհան քաղաքի գիտնականները, որտեղ գրանցվել է COVID-19-ի առաջին բռնկումը, նախատեսում էին քարանձավաբնակ չղջիկներին կորոնավիրուսով վարակել դեռևս 2018 թվականին։ Նման պնդմամբ է հանդես եկել The Telegraph պարբերականը՝ վկայակոչելով հետազոտությունների մասին ուսումնասիրված փաստաթղթերը:
Ըստ պարբերականի՝ գիտնականները ծրագրի համար 14 միլիոն դոլարի հարցում են ներկայացրել կառավարությանը COVID-19-ի բռնկման մասին պաշտոնական հաղորդագրություններից առնվազն 18 ամիս առաջ: Ենթադրաբար, Ուհանի գիտնականները մտադիր էին մոդիֆիկացված օդակաթիլային կորոնավիրուսներ մտցնել Չինաստանում չղջիկների բնակավայրեր, որպեսզի դրանով պաշտպանեն կենդանիներին այնպիսի հիվանդություններից, որոնք կարող են փոխանցվել մարդկանց։
Գիտնականները ցանկացել են կենդանիների մաշկի միջոցով ներարկել կորոնավիրուսների նանոմասնիկներ, որոնք «պարունակում են նոր քիմերային սպիտակուցներ»: Նախատեսվում էր դա անել չինական Յունան նահանգի քարանձավներում: Նաև առաջարկվել է ստեղծել քիմերային վիրուսներ, որոնք կլինեն գենետիկորեն ձևափոխված՝ մարդկանց ավելի թեթև վարակման համար: Ուհանի գիտնականները նաև ցանկանում էին փորձել փոփոխություններ մտցնել չղջիկների կորոնավիրուսի մեջ, որպեսզի վիրուսն ավելի հեշտ փոխանցվի մարդու բջիջներին, հավելում է թերթը՝ վկայակոչելով փաստաթղթերը:
Չինացի գիտնականներին մերժել են նման նախագծի ֆինանսավորումը, քանի որ այն «կարող է վտանգի տակ դնել տեղի բնակիչներին», չնայած այն հանգամանքին, որ գիտնականները խոստացել էին կրթաճանաչողական միջոցառումներ անցկացնել իրենց աշխատանքի վերաբերյալ, որպեսզի բնակչությունը հասկանար, թե ինչ է կատարվում։
Պարբերականը նշում է, որ փաստաթղթերի համաձայն՝ նման հետազոտությանը կարող էին մասնակցել բրիտանա- ամերիկյան փորձագետ Փիթեր Դասզակը, ինչպես նաև Ուհանի առաջատար վիրուսաբան Շի Չժենլին։
Հավելենք, որ Չինաստանը բազմիցս հերքել է Ուհանի լաբորատորիայում COVID-19 վիրուսի ծագման մասին տեսությունը։
Տաթև Ֆռանգյան
