Հասարակություն
14.09.2021 | 11:54«Ուզում եմ մեծ ուրախությամբ բոլորիս ասել, որ Երևանի ավագանու անդամ, մեր գործընկեր Արման Անտոնյանը վերադարձել է շարք և արդեն այսօր մասնակցում է ավագանու նիստին»,- այս մասին այսօր ավագանու ննիստի ժամանակ նշեց քաղաքապետ Հայկ Մարությանը:
«Ինչ պետք է ասի վերածնված մի մարդ, ով կյանքի ու մահվան կռվում Աստծո հրաշքով և կամքով հաղթահարեց դաժան կռիվն ու օր-օրի սկսեց ապաքինվել:- իրելույթն այսպես սկսեց Անտոնյանը:- Օգոստոսի 1-ին, գիշերը ժամը 1-ին դիմակավոր «թուրք բաշիբոզուկների» կողմից իմ նկատմամբ մահափորձից: Ինձ երկար հետևելով, ապա գիշերը ներխուժելով տուն, վնասելով նաև իմ ընտանիքի անդամներին, քնած վիճակում մահակների բազմաթիվ հարվածներից հիմնականում գլխիս, ապա դանակի ավելի քան 11 հարվածների վիրավորումներից: «Թուրք բաշիբոզուկների» կողմից կյանք խլելու մի գործողություն, որը հարիր է միայն մեր թշնամի ազգին: Երևանի ավագանու անդամի նկատմամբ մահափորձը, մանավանդ իր մասնագիտական գործունեության համար, ուղիղ ոտնձգություն է պետության ու համայնքի նկատմամբ, որում կարող էր իմ փոխարեն լինել ցանկացած մեկը այս դահլիճում կամ այս շենքում, ով բարեխղճորեն կատարում է իր պարտականությունները նաև իր խղճի առաջ:
Այո՛, ես բազմիցս բարձրաձայնել եմ այս ամբիոնից, որ Երևանի քաղաքապետարանում մինչ օրս դեռ շարունակվում է համայնքային միջոցների վատնումը, և ես որպես ավագանու անդամ կա՛մ պետք է աչք փակեի այդ ամենի նկատմամբ, ինչը բացառվում է իմ պարագայում, կա՛մ միջոցներ ձեռնարկեի այդ ամենը շտկելու և շարժվելու առաջ, ինչը, ի շահ Երևանի, արվեց նաև մահափորձից առաջ՝ հուլիսի 24-ին Երևանի ավագանու նիստին՝ նախագծի տեսքով: Զավեշտալին այն է, որ հենց այդ նիստից երկու օր հետո այդ «թուրք բաշիբոզուկների» կողմից մահափորձով ինքնին այդ գործողությամբ հիմնավորվեց, ապացուցվեց ու հիմնավորվեց իմ կողմից բարձրացված խնդիրները: Կարծում եմ դատախազությունը բավական գործ ունի անելու նաև քաղաքապետարանի ներսում»:
Արման Անտոնյանը նաև հավելեց, որ այդ խնդիրների համահեղինակները դեռ շարունակում են աշխատել այս շենքում. «Նաև նրանք, որոնք ցուցաբերում են տոտալ անգործություն ու անտարբերություն: Հարց բոլորիս՝ արդյո՞ք մենք արել ենք եզրահանգումներ, հետևություններ, ամենակարևորը՝ ի՞նչ ենք արել այս ամենից հետո, կամ ի՞նչ չենք արել կանխելու հետագա ոտնձգությունները և ավելի վատ՝ Երևանի հաշվին անձնական շահերի համար մարդու կյանք խլելու փորձերը»:
Ավագանու անդամը շնորհակալություն հայտնեց բոլորին սրտացավություն դրսևորելու և աղոթքների համար, բժիշկներին, որոնք փրկեցին կյանքը:
Մանրամասները՝ տեսանյութում:
