Սահմանի որոշումը ենթադրում է փոխզիջում․ հարցն այն է՝ ինչ ենք մենք փոխզիջում, ինչ Ադրբեջանը․ Աղասի Մարգարյան. ՏԵՍԱՆՅՈՒԹ

Հայաստանի ներքին քաղաքական իրավիճակի, Ադրբեջանի հետ հարաբերությունների մասին Factor TV-ի տաղավարում զրուցել ենք քաղաքական վերլուծաբան Աղասի Մարգարյանի հետ

-Պարո՛ն Մարգարյան, Ազգային ժողովից առաջին տպավորություններն ինչպիսի՞ն են։

-Ազգային ժողովում երկու-երեք օր ընթացող գործընթացներից տպավորությունն այնպիսին է, որ ԱԺ-ում առաջին անգամ հայտնված ուժերը կամ քաղաքական խմբերը փորձում են իրենց դիրքավորել։ Ըստ էության, այդ դիրքավորման կարիքը չկար, քանի որ նախորդ ամիսների ընթացքում արդեն պարզ էր բոլոր քաղաքական ուժերի և քաղաքական խմբերի և՛ դիրքավորումը, և՛ մոտեցումը, և՛ սկզբունքները։

-Երեկ երեկոյան հրապարակվեց վարչապետ Նիկոլ Փաշինյանի խոսքը պաշտպանության նախարարին ներկայացնելիս։ Այնտեղ խոսք կար Ադրբեջանի հետ բանակցությունների մասին։ Արդեն այսօր Վարդենիսում նորից լարվածություն է ստեղծում Ադրբեջանը։ Ի՞նչ է ուզում անել, և ի՞նչ է ուզում ասել մեզ։

-Կարծես թե հստակ է երկու կարևոր խնդիր․ երկու կողմն էլ՝ և՛ Հայաստանը, և՛ Ադրբեջանը, նշում են սահմանազատման և սահմանագծման մասին, նշում են դրա անցնելու անհրաժեշտության մասին։ Այդ մասին խոսում է Մակրոնը, խոսում են ռուսական կողմում, բոլորը խոսում են դրա կարևորության մասին։ Եվ այստեղ հարց է առաջանում՝ ինչո՞ւ դա չի սկսվում և ինչո՞ւ ենք տեսնում լարվածության օջախներ, էսկալացիայի դեպքեր Ադրբեջանի սադրանքների միջոցով։

Կարծում եմ՝ հարցը շատ պարզ է։ Հայկական կողմը, ենթադրում եմ, միակ նախապայման ունի՝ ադրբեջանական զինված ուժերի հետքաշումը Հայաստանի սուվերեն տարածքից։ Իսկ ադրբեջանական կողմը, ենթադրում եմ, նախապայման է դիտարկում առկա իրավիճակով, առկա ստատուս քվոյի պայմաններում սկսել այդ աշխատանքները։

Մենք կարո՞ղ ենք նահանջ կատարել, այսպես ասած, ընդառաջ կատարել Ադրբեջանի նկրտումներին։ Այս հարցը միանշանակ պատասխան չունի, որովհետև այստեղ «կամ-կամ»-ի տիրույթում չեն լուծվում հարցերը։ Եվ նույնիսկ հակառակորդի հետ հարաբերություններում պետք է բանակցային գործընթաց, և այդ բանակցային գործընթացը ենթադրում է որոշակի փոխզիջումային մեխանիզմների կիրառում։ Այստեղ հարցն այն է, թե մենք ինչ ենք փոխզիջում, և ինչ է փոխզիջում Ադրբեջանը։

-Ադրբեջանը պիտի փոխզիջի մեր տարածքը։ Մենք ի՞նչ ունենք փոխզիջելու։

-Չեմ կարող պատասխանել այդ հարցին։ Բայց մյուս կողմից՝ մենք գտնվում ենք մի կարևոր տարածաշրջանում, որտեղ Հայաստանն առանցքային դերակատարություն ունի կոմունիկացիաների առումով։

Հարցազրույցն ամբողջությամբ՝ տեսանյութում։

Գարիկ Հարությունյան