Ավստրիայի, Ռումինիայի, Լիտվայի ԱԳ նախարարները հանդիպել են Իլհամ Ալիևին ու Ջեյհուն Բայրամովին․ ԼՈՒՍԱՆԿԱՐՆԵՐ

Տարածաշրջանային այցով Բաքվում գտնվող Ռումինայի ԱԳ նախարար Բոգդան Աուրեսկուն, Ավստրիայի ԱԳ նախարար Ալեքսանդր Շալլենբերգն ու Լիտվայի ԱԳ նախարար Գաբրիելյուս Լանդսբերգիսը հանդիպել են Ադրբեջանի նախագահ Իլհամ Ալիևին։

Նրանք նաև առանձին բանակցություններ են անցկացրել Ադրբեջանի ԱԳ նախարար Ջեյհուն Բայրամովի հետ, որին մասնակցել է նաև Ադրբեջանի նախագահի օգնական, աշխատակազմի արտաքին քաղաքականության հարցերով բաժնի պետ Հիքմեթ Հաջիևը։

Անցկացված հանդիպումների վերաբերյալ եվրոպացի դիվանագետները տեղեկացրել են թվիթերյան գրառումներով։

«Լավ բանակցություններ նախագահ Իլհամ Ալիևի և ԱԳ նախարար Ջեյհուն Բայրամովի՝ հետ Ադրբեջանի ու Հայաստանի հաշտեցման հետագա քայլերի և Արևելյան գործընկերության ամրապնդման մասին։ Ժոզեպ Բորելի անունից մենք հայտնեցինք ԵՄ հետաքրքրությունը՝ Ադրբեջանի հետ ավելի ընդլայնված համագործակցության վերաբերյալ»,- մասնավորապես ասվում է Լիտվայի ԱԳՆ գրառման մեջ։

Իր հերթին, Ռումինիայի ԱԳ նախարար Բոգդան Աուրեսկուն գրել է, որ նախագահ Ալիևի հետ արդյունավետ հանդիպում է անցկացվել։

«Մենք ուսումնասիրեցինք կոնկրետ ուղիները՝ հետկոնֆլիկտային իրավիճակում ԵՄ-ի հետ համագործակցության հետ կապված, ներառյալ վերակառուցումը, չլուծված խնդիրների լուծումը, վստահության ամրապնդումը, կայունացումն ու տարածաշրջանային զարգացումը»,- գրել է դիվանագետը։

Ավստրիայի ԱԳՆ թվիթերյան գրառումից էլ տեղեկանում ենք, որ նախարար Շալլենբերգը հանդիպել է նախագահ Իլհամ Ալիևին:

«ԵՄ-ն ամեն ինչ կանի՝ աջակցելու տարածաշրջանում վստահության ամրապնդմանը։ Յուրաքանչյուր փոքրիկ կայծը կարող է վերականգնել կրակը Լեռնային Ղարաբաղում։ Մեզ անհրաժեշտ է կայունություն, որը կարող է  առաջնորդել կայուն քաղաքական կարգավորումը»,- ասվում է գրառման մեջ։

Հիշեցնենք, որ եվրոպական երկրների ԱԳ նախարարները կայցելեն նաև Երևան և Թբիլիսի։

Էմմա Չոբանյան