24.11.2024 | 12:41
Օտարերկրյա ԶԼՄ-ներում շարունակում են զետեղվել սպառազինության ձեռքբերման մասին կեղծ հրապարակումներ․ ՊՆ
«Երկիր Ծիրանին» կոչ է անում բոյկոտել դեղատոմսով դեղ ձեռք բերելու ծրագրի ներդնումը
Հասարակություն
28.02.2018 | 12:14
2018 թվականի մարտի 1-ից նախատեսվում է գործածության մեջ դնել Հայաստանի Հանրապետության կառավարության՝ «Դեղատոմսերի ձևերը, դեղատոմսեր գրելու, դեղեր բաց թողնելու կարգը, ինչպես նաև դեղերի և դեղանյութերի հաշվառման կարգը սահմանելու մասին» որոշումը, համաձայն որի՝ Հայաստանում մի շարք դեղեր մարտի 1-ից հնարավոր կլինի ձեռք բերել միայն դեղատոմսերով. տեղեկացնում է «Երկիր Ծիրանի» կուսակցության լրատվական ծառայությունը:
Հայաստանի Հանրապետության առողջապահության նախարարությունը պարտավոր է իրականացնել այնպիսի քաղաքականություն, որի հիման վրա հնարավոր է ապահովել առաջին և մատչելի բժշկական օգնության տրամադրումը: Մինչդեռ ոչ մի միջոց չի ձեռնարկվել այս ուղղությամբ, դեռ ավելին՝ կրկին փորձ է կատարվում իրագործել առողջապահական ծառայությունների ոլորտը առավել մենաշնորհային դարձնելու դատապարտելի ծրագիրը:
Դեղերի ձեռքբերումը միայն դեղատոմսերի միջոցով հնարավոր չէ ներդնել Հայաստանի Հանրապետությունում: Մինչ նման ծրագրի իրագործումը՝ անհրաժեշտ է ունենալ համապատասխան պայմաններ, ինչը բացակայում է Հայաստանի Հանրապետությունում: Հարևան Վրաստանի Հանրապետությունում նմանատիպ ծրագրի իրականացման փորձը ձախողվել է: Այս ծրագրի ներդնումը մեզ մոտ նույնպես դատապարտված է ձախողման:
Սույն ծրագիրն իր մեջ պարունակում է հսկայական կոռուպցիոն մեխանիզմներ և գործելու է ի շահ մենաշնորհների՝ նպաստելով առանց այն էլ դեղորայքի շուկայի մենաշնորհմանը և բժշկական ծառայություններ մատուցող կազմակերպությունների մենաշնորհային դիրքի մեծացմանը:
«Երկիր Ծիրանի» կուսակցությունը դատապարտում է առողջապահության ոլորտում հերթական անհիմն որոշումը, որը լուրջ խնդիրների առջև կկանգնեցնի բազմահազար քաղաքացիներին, բժշկական հաստատությունների ու դեղատների աշխատակիցներին, կոռուպցիոն նոր հնարավորություններ կստեղծի և կընդլայնի մենաշնորհների հնարավորությունը:
«Երկիր Ծիրանի» կուսակցությունը կոչ է անում մերժել` բոյկոտել այս ծրագրի ներդնումը:
