14.09.2026 | 19:44
Երևանում մեկնարկել է կայուն տրանսպորտային միջանցքներին նվիրված աշխատաժողով
Արա Աբրահամյանը պատասխանել է Բաքվին
Քաղաքականություն
18.06.2021 | 12:58
Ռուսաստանում հայերի միության նախագահ Արա Աբրահամյանը «ՌԻԱ Նովոստիին» ասել է, որ դեռևս պաշտոնական ծանուցում չի ստացել իրեն միջազգային հետախուզում հայտարարելու մասին։
Նա հայտարարել է, որ Բաքվի մեղադրանքներն անհեթեթություն են։
«Ադրբեջանի դատախազությունն ինչ ասես՝ կարող է հայտարարել, ինձ դա չի հուզում։ Լավ կլինի, որ նրանք զբաղվեն իրենց հանցագործներով, որոնք Ղարաբաղում ոտնահարում են մարդու իրավունքները։ Իսկ այն, ինչ նրանք հորինում են, անհեթեթություն է և ինձ չի հուզսում։ Ինձ համար դա ծիծաղելի է»,- ասել է Աբրահամյանը։
Հիշեցնենք՝ Ադրբեջանի Գլխավոր դատախազությունը միջազգային հետախուզում է հայտարարել 3 հայ գործարարների՝ «Տաշիր» ընկերության ղեկավար Սամվել Կարապետյանի, «Royalsys Engineering»-ի սեփականատեր Դավիթ Գալստյանի (Պատրոն Դավո) և «KOMEX» ընկերության գլխավոր տնօրեն, Ռուսաստանի հայերի միության նախագահ Արա Աբրահամյանի դեմ։ Ադրբեջանական լրատվամիջոցների հաղորդմամբ՝ Գլխավոր դատախազությունը հետաքննություն է անցկացրել մի շարք ԶԼՄ-ում արված հրապարակումների ու սոցիալական ցանցերում առկա տեղեկատվության հիման վրա և եկել եզրահանգման, որ, իբր, անօրինական կերպով զենք ու զինամթերք է տեղափոխվել Հայաստան, այնտեղից էլ՝ Լեռնային Ղարաբաղ։ Ադրբեջանը հայ գործարարներին մեղադրում է քաղաքացիական ու բեռնատար ինքնաթիռներով զենքի անօրինական տեղափոխումը կազմակերպելու մեջ։
Տաթև Ֆռանգյան
