Ինչի՞ համար եք դատում, եթե դա օրենքի բաց ա, կամ ինչ-որ մեկի ցանկությունը՝ այդպես էլ ասեք. Սամվել Բաբայան

Վերաքննիչ քրեական դատարանում այսօր շարունակվում է ԼՂ ՊԲ նախկին հրամանատար Սամվել Բաբայանի և մյուսների գործով ընդդեմ Առաջին ատյանի դատարանի վճռի բողոքի քննությունը:

Հիշեցնենք, որ Առաջին ատյանի դատարանի վճռով Սամվել Բաբայանն ազատազրվել է վեց տարի ժամկետով: Վերաքննիչ գործն արդեն դատական վիճաբանությունների փուլում է: Այսօր պաշտպանական ճառով հանդես եկավ Բաբայանի պաշտպան Ավետիս Քալաշյանը:

«Գործում եղած ողջ ապացույցները փաստում են այն, որ Սանասար Գաբրիելյանը միջոցներ է ձեռնարկել այդ զենքը ձեռք բերելու ուղղությամբ, որը պետք է նվիրեր բանակին: Հրաչյա Մայիլյանից նա պետք է վերցներ զենքը, սակայն հետագայում հրաժարվել է: Հարց է առաջանում՝ Սամվել Բաբայանին որքանո՞վ է առնչվում այս գործը, իրեն առաջադրված մեղադրանքի հանցակազմը կա՞, թե՞ ոչ»,- նշեց փաստաբանը:

Քալաշյանը հավելեց,, որ ըստ մեղադրանքի Սամվել Բաբայանը, դրդել է Սանասար Գաբրիելյանին զենք ձեռք բերել, որի համար ինքը պետք է վճարեր: Մինչդեռ նշվում է նաև, որ Սանասար Գաբրիելյանը դեռ չէր կողմնորոշվել՝ վերցնի զենքը, թե՝ ոչ. «Եթե զենքի համար պետք է վճարեր Սամվել Բաբայանը, ի՞նչն էր Սանասար Գաբրիելյանի չկողմնորոշվելու պատճառը»:

Փաստաբանը պնդեց՝ առաջադրված մեղադրանքն անհիմն է, քանի որ գործի փաստերը հակառակն են ապացուցում. «Ռոբերտ Աղվանյանի տված ցուցմունքով էլ ավելի հաստատվեց, որ Հրաչյա Մայիլյանը զենք ձեռք բերելու գործողություններն իրականացրել է իր նախաձեռնությամբ, առանց անգամ Սանասար Գաբրիելյանին տեղեկացնելու»:

Փաստաբանն անդրադարձավ նաև գաղտնալսումներին՝ ասելով, որ դրանք անթույլատրելի ապացույցներ են. «Բերված են գաղտանլսումներ և դրանց վերաբերյալ ենթադրական դատողություններ, որոնք չեն կարող հիմք հանդիսանալ առաջդրված մեղադրանքին»:

Բաբայանի պաշտպանն անհեթեթ համարեց նաև հանցավոր ճանապրհով կեղծ թղթադրամներ պահելու և շրջանառելու մեղադրանքը: «Խնդրում եմ Սամվել Բաբայնի գործով երկու դրվագներով էլ կայացնել արդարացման դատավճիռ»,- պահանջեց փաստաբանը:

Դատավորը ձայնի իրավունք տվեց նաև ԼՂՀ ՊԲ նախկին հրամանատար Սամվել Բաբայանին, ով նախքան ոտքի կանգնելը հարցրեց՝ «Իսկ էդ մեր ասելիքները ինչ-որ արդյունք կտա՞ն, թե ձևական են»:

Բաբայանն անդրադարձավ գաղտնալսումներին՝ ասելով, որ մեղադրանքի հիմքում կոնտեքստից կտրված հատվածներ են. «Դուք ձեզ համար գոնե մի անգամ միացրեք էդ գաղտալսումները և լսեք, երկու ժամ խոսակցությունից կտրել են՝ երկու րոպեն հանել, դրել մեղադրանքի հիմքում»:

Բաբայանը նշեց՝ ինքը բացատրել է, որ հրթիռը չի աշխատի, քանի որ մասեր են բացակա, և այն պիտանի չէ: «Ես ասել եմ, որ դա կիսատ, չաշխատող հրթիռ է, եթե ձեռքումդ բռնեն կդատեն, ասել եմ՝ դիր տուփի մեջ, տար- դիր էսինչ գյուղում: Ես իմ ասած բառերից չեմ հրաժարվում: Ո՞նց եք դատում, ինչի՞ համար եք դատում: Եթե դա օրենքի բաց ա, կամ ինչ-որ մեկի ցանկությունը՝ այդպես էլ ասեք: Ես որևէ օրենք չեմ խախտել, խնդրում եմ արդարացի վճիռ: Փաստերը դրեք համեմատեք, նոր վճիռ կայացրեք»,- եզրափակեց Բաբայանը:

Լիլիթ Շաբոյան