ԱԺ-ն խստագույնս դատապարտում է ՀՀ տարածքային ամբողջականության նկատմամբ ոտնձգությունը․ ԱԺ հայտարարության նախագիծը․ ՏԵՍԱՆՅՈՒԹ

Մեր նախաձեռնության հիմնական նպատակը ոչ միայն ստեղծված իրավիճակն արձանագրելն է, այլև փորձել հասկանալ, թե ինչ է կատարվում այդ հարցերի շուրջ։ ԱԺ արտահերթ նիստում այս մասին ասաց ԱԺ «Բարգավաճ Հայաստան» խմբակցության քարտուղար Արման Աբովյանը։

Պատգամավորը նշեց, որ ԲՀԿ-ն համապատասխան գերատեսչություններին հրավերներ է ուղարկել, որպեսզի մասնակցեին արտահերթ նիստին և հնարավոր լիներ հարցերն իրենց ուղղել։ Այս պահին, սակայն, խորհրդարանում է միայն ԱԳՆ-ի ներկայացուցիչը, իսկ ուժային կառույցների ներկայացուցիչներն առայժմ չկան։

«Բոլորիս համար շատ կարևոր է ոչ միայն հասկանալ՝ ինչ է կատարվում, այլև տեղեկություն ստանալ այն գերատեսչություններից, որոնք այս կամ այն կերպ ներգրավված են Սյունիքի հետ կապված իրադարձություններում»,- ասաց Աբովյանը։

ԲՀԿ խմբակցության քարտուղարն ընթերցեց խմբակցության ներկայացրած՝ «Սահմանամերձ գոտիներում, մասնավորապես, Սյունիքում, Գեղարքունիքում և Վայոց ձորում ստեղծված ճգնաժամային իրավիճակի, առկա խնդիրների և դրանց լուծման ուղիների, սահմանների պաշտպանության և անվտանգության ապահովմանն ուղղված հարցերի վերաբերյալ» ՀՀ ԱԺ հայտարարության նախագծի տեքստը:

«Հայաստանի Հանրապետության Ազգային ժողովն արձանագրում է, որ 2021 թվականի մայիսի 12-ին Սյունիքի մարզի Սև լճի տարածքից ադրբեջանական զինուժը հատել է Հայաստանի Հանրապետության պետական սահմանը, «սահմանների ճշգրտման» պատրվակով խորացել մի քանի կիլոմետր դեպի Վերիշեն բնակավայր…

Ադրբեջանական զինուժի այս գործողություններն անընդունելի են Հայաստանի Հանրապետության համար, դա ակնհայտ ոտնձգություն է Հայաստանի Հանրապետության ինքնիշխան տարածքի նկատմամբ և Հայաստանի Հանրապետությունը չի հանդուրժի ստեղծված իրավիճակը:

Հաշվի առնելով Ադրբեջանի վարած հակահայկական ռազմատենչ քաղաքականությունը, Ադրբեջանի ղեկավարության կողմից վերջին շրջանում Հայաստանի Հանրապետության տարածքային ամբողջականության նկատմամբ բացահայտ նկրտումները, այդ թվում՝ ուժի կիրառման սպառնալիքներ պարունակող հայտարարություններ և պետական քաղաքականության մակարդակով քարոզվող հայատյացությունը՝ Հայաստանի Հանրապետության Ազգային ժողովը խստագույնս դատապարտում է Ադրբեջանի կողմից Հայաստանի Հանրապետության տարածքային ամբողջականության նկատմամբ ոտնձգությունները և փաստում, որ Ադրբեջանի կողմից վարվող ագրեսիվ քաղաքականությունը խախտում է միջազգային իրավունքի հիմնարար նորմերը, այդ թվում՝ ՄԱԿ-ի Կանոնադրության 2-րդ հոդվածում ամրագրված սկզբունքները, ինչը Հայաստանի Հանրապետությանն իրավունք էվերապահում իրականացնել միջազգային իրավունքի և Հայաստանի Հանրապետության օրենսդրությամբ նախատեսվող համարժեք գործողություններ:

Ազգային ժողովը, որպես Հայաստանի Հանրապետության ժողովրդի բարձրագույն ներկայացուցչական մարմին հայտարարում է.

ձեռնարկվելու են բոլոր համարժեք միջոցներն Ադրբեջանի ռազմական ագրեսիան կասեցնելու և մեր պետական սահմանն ու ժողովրդին պաշտպանելու նպատակով,

կոչ ենք անում միջազգային հանրությանը դատապարտել՝  Ադրբեջանի կողմից Հայաստանի Հանարպետության տարածքային ամբողջականության դեմ ուղղված սադրիչ գործողությունները, ուժի գործադրման սպառնալիքներն ու փաստացի գործադրումը, որը սպառնում է տարածաշրջանային խաղաղությանը և անվտանգությանը»,-նշված էր հայտարարության մեջ:

Աբովյանն ընթերցեց նաև հայտարարության նախագծի հիմնավորումը:

Մանրամասները՝ տեսանյութում: