24.06.2026 | 19:34
Որքա՞ն արժե ծիրանը․ գյուղացիները բերքի իրացման այլընտրանքներ են փնտրում. ՏԵՍԱՆՅՈՒԹ
Հունաստանի վարչապետ․ Թուրքիայի ագրեսիվ պահվածքի մասին տեղեկացրել ենք ՆԱՏՕ-ին և ԱՄՆ-ին
Քաղաքականություն
16.02.2018 | 17:54
Վերջին շրջանում Հունաստանի և Թուրքիայի միջև Էգեյան ծովում մեծացած լարվածությունը տեղափոխվել է ՆԱՏՕ-ի հարթակ։ Հունաստանի վարչապետ Ալեքսիս Ցիպրասը Թուրքիային մեղադրել է ագրեսիվ պահվածքի համար։ Նա տեղեկացրել է, որ Հունաստանը Թուրքիայի դեմ բողոք է ներկայացրել ՆԱՏՕ-ին և ԱՄՆ-ին. փոխանցում է EH-ն:
Ցիպրասն ընդգծել է, որ իրենք չեն հանդուրժի Հունաստանի տարածքային ամբողջականության դեմ ուղղված հարձակումները և հիշեցրել, որ Հունաստանի սահմանները միևնույն ժամանակ 28 անդամ ունեցող Եվրամիության սահմաններն են։
«Մենք ՆԱՏՕ-ին և ԱՄՆ-ին ներկայացրել ենք վերջին շրջանի Թուրքիայի սադրիչ գործողությունները։ Հունաստանը խաղեր խաղացող երկիր չէ։ Մեր ուղերձը շատ հստակ է և միշտ էլ այդպես կլինի։ Հունաստանը երբեք չի հանդուրժի սեփական տարածքային ամբողջականության և ինքնիշխանության դեմ ուղղված և ոչ մի բռնություն», – ասել է վարչապետը։
Բրյուսելում գտնվող Հունաստանի արտգործնախարար Պանոս Կամմենոսը ևս հայտարարել էր, որ իրավիճակի մասին տեղեկացրել է ՆԱՏՕ-ին և ԱՄՆ-ին։ Նա ընդգծել էր, որ օրեր առաջ Էգեյան ծովում հունական և թուրքական ռազմածովային ուժերի նավերի բախումը պատահականություն չէր, ինչի վերաբերյալ ապացույցներ է ներկայացրել Բրյուսելում։
Իսկ Եվրախորհրդարանի փոխնախագահ և Սիրիզա կուսակցության պատգամավոր Դիմիտրիոս Պապադիմոուլիսը իր թվիթերյան միկրոբլոգում Թուրքիայի վերաբերյալ հետևյալ գրառումն է կատարել․ «Թուրքական կառավարության ագրեսիվ հայտարարությունները որևէ կերպ չեն կարող նպաստել Հունաստանի և Թուրքիայի միջև վստահության և համագործակցության վրա հիմնված հարաբերությունների զարգացմանը։ Բարիդրացիական հարաբերություններն ու երկու երկրների շահերը պարտադրում են հարգանք ցուցաբերել միջազգային իրավունքի նկատմամբ»։
